Vurugu Mgodi wa Dirifu, Mtafutano baada ya Risasi kusikika"Tunataka Mlima wetu"

Serikali imesitisha huduma katika mgodi namba PML 42 NA PML 43 wa kijiji cha Dirif Manispaa ya Mpanda kwa muda usiojulikana,baada ya kuzuka taharuki baina ya wachimbaji wadogo na Mwekezaji Kamtoni wakitumia mawe, marungu na mapanga kumzuia asiendelee kuchimba dhahabu wakidai ni mali yao hali iliyopelekea polisi kufyatua risasi mbili kuwatawanya. Wachimbaji hao walisikika wakipaza sauti zao “tunataka mlima wetu” wakidai hawana imani na uongozi wa kikundi cha Kagera waliowapa dhamana ya kusimamia mgodi huo kisha kutafuta leseni ya umiliki wao binafsi. Mmoja wa wanakikundi cha Kagera Emmanuel Masumbuko amesema mgodi huo ni mali yao baada ya kujiunga kwenye kikundi cha watu 28 walifuata taratibu zote wakakata leseni kisha kutafuta mwekezaji. Kwa upande wake Diwani wa kata ya Magamba Fortunatus Chiwanga anakiri kupokea malalamiko ya wachimbaji hao kuhusu mgogoro baina yao na kikundi cha Kagera akidai aliufikisha ofisi ya kata kupitia kikao cha maendeleo. Mkurugenzi Mtendaji wa Manispaa ya Mpanda Sophia Kumbuli aliyeambatana na kamati ya ulinzi na usalama amesitisha huduma katika mgodi huo, akiwaomba wachimbaji kuwa na subira hadi suluhu itakapopatikana. Kijiji cha Dirifu kilichopo kata ya Magamba Manispaa ya Mpanda kinazungukwa na milima inayosadikika kuwa na madini ya dhahabu ambapo wananchi wake wanategemea zaidi shughuli za uchimbaji kujitafutia kipato ili Kukidhi Familia zao. SiteNews