மீஞ்சூர் திருவெள்ளவாயலில் திருவெள்ளீஸ்வரர் கோயில் கும்பாபிஷேகம் - திரளான பக்தர்கள் சாமி தரிசனம்

திருவள்ளூர் அருகே 1,000 ஆண்டுகள் பழமையான திருவெள்ளீஸ்வரர் கோயில் கும்பாபிஷேகம்: திரளான பக்தர்கள் சாமி தரிசனம் திருவள்ளூர் மாவட்டம், மீஞ்சூர் ஒன்றியத்திற்குட்பட்ட திருவெள்ளவாயில் கிராமத்தில் அமைந்துள்ள, ஆயிரம் ஆண்டுகள் பழமை வாய்ந்த அருள்மிகு சாந்தநாயகி சமேத ஸ்ரீ திருவெள்ளீஸ்வரர் திருக்கோயில் மகா கும்பாபிஷேக விழா இன்று மிகச் சிறப்பாக நடைபெற்றது. இக்கோயிலின் புனரமைப்புப் பணிகள் நிறைவடைந்ததைத் தொடர்ந்து, கும்பாபிஷேக விழாவிற்கான யாகசாலை பூஜைகள் தொடங்கி கணபதி ஹோமம், நவகிரக ஹோமம் மற்றும் பல்வேறு காலயாகசாலை பூஜைகள் வேத மந்திரங்கள் முழங்க விமரிசையாக நடத்தப்படது விழாவின் முக்கிய நிகழ்வாக, யாகசாலையில் இருந்து புனித நீர் அடங்கிய கலசங்கள் மங்கள வாத்தியங்கள் மற்றும் சிவ வாத்தியங்கள் முழங்கப் புறப்பாடு செய்யப்பட்டன. பின்னர், சிவாச்சாரியார்கள் வேத மந்திரங்களை ஓத, திருக்கோயிலின் விமான ராஜகோபுர கலசங்கள் மற்றும் மூலவர் சன்னதி கலசங்கள் மீது புனித நீர் ஊற்றப்பட்டு மகா கும்பாபிஷேகம் நடைபெற்றது. அப்போது அங்கு கூடியிருந்த பல்லாயிரக்கணக்கான பக்தர்கள் "நமச்சிவாய" கோஷங்களை எழுப்பி பக்திப் பெருக்குடன் வழிபட்டனர்.கும்பாபிஷேகத்தைத் தொடர்ந்து, மூலவர் திருவெள்ளீஸ்வரர் மற்றும் அம்பாள் சாந்தநாயகிக்கு சிறப்பு அபிஷேகங்கள் செய்யப்பட்டு, மகா தீபாராதனை காண்பிக்கப்பட்டது. விழாவில் பங்கேற்ற பக்தர்கள் அனைவருக்கும் புனித நீர் தெளிக்கப்பட்டு, ஆலய நிர்வாகத்தின் சார்பில் பிரசாதமும், அன்னதானமும் வழங்கப்பட்டன. கும்பாபிஷேக விழாவிற்கான ஏற்பாடுகளை கோயில் நிர்வாகிகள் மற்றும் கிராம பொதுமக்கள் மிகச் சிறப்பாக செய்திருந்தனர்.