ISIOLO YAANDAA MASHINDANO YA HUDUMA YA KWANZA KANDA YA MASHARIKI YA JUU

Mashindano ya huduma ya kwanza kwa kanda ya Mashariki ya Juu yamefanyika katika Shule ya Upili ya Wasichana ya Isiolo, yakiwashirikisha washiriki kutoka magatuzi ya Isiolo , Marsabit na Samburu Akizungumza baada ya kukamilika kwa mashindano hayo, Januaris Kasanga , ambaye ni Afisa wa Usimamizi wa Majanga wa Kanda ya Mashariki ya Juu wa shirika la msalaba mwekundu , amesema kuwa washiriki walihusisha wanafunzi wa shule za msingi, shule za upili pamoja na mashirika yanayojihusisha na masuala ya usimamizi wa majanga. Ameongeza kuwa timu kutoka magatuzi ya Isiolo na Samburu ndizo zitakazowakilisha kanda ya Mashariki ya Juu katika mashindano ya kitaifa yatakayofanyika jijini Nairobi. Kwa mujibu wa Kasanga , lengo kuu la kuandaa mashindano hayo ya huduma ya kwanza ni kuimarisha maandalizi ya kukabiliana na majanga mbalimbali yanayotokea mara kwa mara, hususan yale yanayotarajiwa wakati wa mvua ya El Niño pamoja na vurugu zinazoshuhudiwa wakati na baada ya uchaguzi kuu. Naye Juma Fredrick , msimamizi wa timu ya Samburu, amesema ameridhishwa na kiwango cha mashindano hayo, akiyataja kama hatua muhimu kutoka ngazi ya kaunti hadi ngazi ya kikanda, kuelekea mashindano ya kitaifa. Ameongeza kuwa mwaka uliopita waliwakilishwa na timu moja pekee, lakini mwaka huu wamefanikiwa kupeleka timu mbili katika mashindano ya kitaifa. Fredrick amesisitiza kuwa kuwapa wanafunzi ujuzi wa huduma ya kwanza ni jambo la msingi kwani utawawezesha kujisaidia wao wenyewe pamoja na kusaidia familia na jamii zao pindi ajali au majanga yanapotokea. Kwa upande wake, Zuhura Abdikadir, ambaye ni mhudumu wa huduma ya kwanza wa kujitolea wa shirika la msalaba mwekundu katika tawi la Isiolo , amesema hii ni mara ya pili kwao kufuzu hadi ngazi ya kitaifa na wanatarajia kurejea na ushindi. Naye Fatuma Hussein, ambaye pia ni mhudumu wa huduma ya kwanza wa kujitolea wa shirika la msalaba mwekundu katika tawi la Isiolo, amesema amefurahishwa na mashindano hayo na ameishukuru Shirika la Msalaba Mwekundu kwa kuandaa mashindano ya huduma ya kwanza kwa kanda ya Mashariki ya Juu. Join this channel to get access to perks:    / @wasotv   WASO TV - Informing and Entertaining