Aktivitet festiv në batalionin e Këmbësorisë Alpine në Vaun e Dejës

Në mjediset e batalionit të Këmbësorisë Alpine në Vaun e Dejës, u zhvillua sot për fëmijët e ushtarakëve një aktivitet festiv me rastin e festave të fundvitit. Ishin të pranishëm: ministrja e Mbrojtjes, znj. Mimi Kodheli, shefi i Shtabit të Përgjithshëm i FA, gjeneralmajor Jeronim Bazo, gjeneralë, drejtorë drejtorish dhe ushtarakë nga Ministria e Mbrojtjes dhe Shtabi i Përgjithshëm i FA, si dhe mjaft të ftuar të tjerë. Gjithashtu në këtë aktivitet ishin ftuar dhe morën pjesë nxënësit e shkollës 9-vjeçare të qytetit të Vaut të Dejës. Ministrja e Mbrojtjes Kodheli, në përshëndetjen e saj drejtuar fëmijëve pjesëmarrës në këtë veprimtari festive, pasi i uroi atyre festat e Krishtlindjes dhe të Vitit të Ri, theksoi se puna që bëjnë prindërit tuaj, duke shërbyer në Forcat tona të Armatosura, është një nga punët nga më dinjitozet për të cilën ju duhet të ndjeheni krenar. Në vijim të këtij aktiviteti, fëmijët e ushtarakëve dhe grupi kulturor i shkollës 9-vjeçare Vau i Dejës, dhanë për të pranishmit një koncert të shkurtër artistik, ku interpretuan me shumë talent këngë, recitime dhe valle të ndryshme. Në fund, për fëmijët e ushtarakëve, ministrja e Mbrojtjes, znj. Mimi Kodheli, shpërndau dhurata për festat e Krishtlindjes dhe Vitit të Ri. Më pas, znj. Kodheli shoqëruar nga gjeneralmajor Jeronim Bazo u njoh nga afër me kushtet e jetesës së efektivave të këtij reparti, si dhe konsumoi një drekë së bashku me ta në mensën e batalionit.