Gəgiran sakinləri növbəti torpaq sürüşməsindən ehtiyat edirlər

Ötən ilin noyabr ayında Lənkəranda yağan güclü yağışlar bir neçə kənddə sel daşqınlarına və torpaq sürüşmələrinə səbəb oldu. Ardınca rayona gələn xüsusi komissiya yerli İcra Hakimiyyəti ilə həmin ərazilərə baxış keçirərək əhaliyə dəymiş ziyanı hesabladı. Daha sonra təbii fəlakətdən zərərçəkən sakinlərə müvafiq köməkliklər göstərildi. Həmin vaxtdan 7 ay keçməsinə baxmayaraq rayonun Gəgiran kəndindən televiziyamıza müraciət edən 3 sakin torpaq sürüşməsindən sonra real təhlükə ilə üz-üzə qaldıqlarını bildirirlər. Lənkəranın Gəgiran kənd sakini Əlimirzə Nəhmətov bildirir ki, 1991-ci ildən öz zəhməti ilə tikdiyi bu evdə yaşayıb. Lakin ötən ilin noyabr ayında yağan güclü yağışlar nəticəsində evin qarşısındakı bir neçə metr torpaq sahəsi sürüşüb və ərazidə dərə yaranıb. Sonradan isə evin lap yaxınlığında çatlar əmələ gəldiyindən onlar yaşadıqları evləri tərk etməli olublar. Əlimirzə Nəhmətov - Gəgiran kənd sakini “3 ailə yaşayırdıq bu evdə. İndi hər birimiz bir yerdə daxma qurmuşuq orada qalırıq.” Kənddə eyni problemlə üzləşdiyini deyən daha bir neçə sakin var ki, onlardan biri Yaqub Nəhmətovdur. Sürüşən torpaq qatının evi üçün real təhlükə yaratdığını deyən kənd sakini aidiyyəti orqanlardan bir köməklik istəsə də hələ də bir nəticə olmadığını bildirir. Yaqub Nəhmətov - Gəgiran kənd sakini “Sabah yağış başlasa bütün o palçıq gəlib evə dirənəcək. Aidiyyəti orqanlardan xahiş edirəm bizə bir texnika versin torpağı oradan təmizləyək. Bizim ona gücümüz çatmaz.” Yaranan vəziyyətlə bağlı hər iki sakin bir neçə quruma dəfələrlə müraciət etdiyini bildirdilər. Onların sözlərinə görə hətta sürüşmə olan əraziyə baxış da keçirilib. Yaqub Nəhmətov - Gəgiran kənd sakini “Rayon İcra Hakimiyyətinə müraciət etmişəm. Fövqəladə Hallar Nazirliyinin qaynar xəttinə zəng vurmuşam. Ekologiya və Təbii Sərvətlər Nazirliyinin müvafiq qurumuna zəng vurmuşam. Yalnız onların əməkdaşları gəlib baxıb çıxıb gediblər.” Əlimirzə Nəhmətov - Gəgiran kənd sakini “Baxış keçiriləndən sonra daha heç kim bura gəlməyib. Heç bir məlumatda vermədilər.” Biz də sözügedən məsələ ilə bağlı Gəgiran kənd İcra nümayəndəliyi və Lənkəran şəhər İcra Hakimiyyəti ilə əlaqə saxladıq. Cavablar isə eyni oldu. Yaradılmış müvafiq komissiya əraziyə baxış keçirib. Hələlik vəziyyət müdaxilə olunacaq səviyyədə deyil. Təbii fəlakət nəticəsində şikayətçi sakinlərin yaşadıqları evə ziyan dəyməyib. Əgər gələcəkdə sürüşmə halı təkrarlanarsa, buradakı evlər ziyan çəkərsə onda lazımi köməklik göstəriləcəyi bildirildi.