Lerikdə 7 kəndin istifadə etdiyi bərbad yol sakinləri narahat edir

Çoxları isti havaların bitməsini arzulasa da, onlar payızın gəlməsini istəmir. Çünki yağışlı havalar başlayan kimi problemləri də artacaq. Hər ilin bu vaxtı 6 aylıq ərzaq tədarüklərini toplayıb yazın gəlməsini gözləyirlər. Söhbət Lerikin bərbad yolundan əziyyət çəkən 7 kəndinin sakinlərindən gedir. Lerikin Bürsülüm, Ləkər, Vov və ümumilikdə 7 ətraf kəndində 1700-ə yaxın sakin yaşayır. Onların hamısının bir ortaq problemi var - keçilməz yollar. Kənd sakini Təyyar Əliyev: “Bizim Bürsülüm kəndindən Pirana qədər 9 kilometr yoldur. Bu yolu biz bir saat yarıma gedirik, halbuki heç 15 dəq yol deyil.” Kənd sakini Zakir Ağayev: “Yol yoxdu, daşlıqdı. Maşın ilişir. Hissə tapılmır, əzab çəkirik.” Bərbad yol səbəbindən yağışlı qarlı havalarda ətraf aləmlə əlaqəsi kəsilən kənd sakinləri artıq indidən qışa ərzaq tədarükü yığır. Ən böyük qorxuları isə kiminsə xəstələnməsidir. Kənd sakini Elçin Zeynalov: “Payızda biz 6 aylıq tədarük yığırıq qışa, çünki yol olmur. Maşınlar hərəkət edə bilmir.” Kənd sakini Vaqif Hüseynov: “Gənclər hamısı baş götürüb gedib kənddən başqa şəhərlərə. Sırf yola görə. Kimsə xəstələnsə maşın onu 30 manata 50 manata aparır. Rəhmətə gedənimiz olub yola görə 3 gün dəfn edə bilməmişik.” Getdikcə daha da dağılan yolu sakinlər öz vəsaitləri hesabına birtəhər saxlamağa çalışırlar. Kənd sakini Hüseynağa Rəhimov: “120 maşın öz pulumuzla torpaq, çınqıl gətirib tökdük yola. Ən pis, keçilməz olan yerlərinə. Nə bələdiyyə, nə digər orqan heç bir köməklik etmədi.” Yolun vəziyyətindən uzun illərdir hərkəs xəbərdar olsa da, tədbir görmək istəyən yoxdur. Bürsülüm kənd icra nümayəndəliyi və bələdiyyəsindən yeni yolun çəkilişinin və ya əsaslı təmirin gündəmdə olmadığı bildirildi.