2026 | July | Lahore | Naunehal Assembly | A Memorable Literary and Educational Journey | 1

Naunehal Assembly | July 2026 "Iqbal, We Salute You": A Memorable Literary and Educational Journey سید علی بخاری علم، کردار، خدمتِ انسانیت اور وطن سے محبت... یہی وہ اقدار ہیں جنہیں شہید حکیم محمد سعیدؒ نے اپنی زندگی کا مشن بنایا، اور آج ہمدرد پاکستان اسی روشن فکر کو نئی نسل تک پہنچانے کے لیے مسلسل سرگرمِ عمل ہے۔اسی سلسلے کی ایک خوبصورت کڑی تھی "اقبال تجھے سلام"، جسے ہمدرد پاکستان اور مجلسِ رومی و اقبال کے اشتراک سے لاہور میں منعقد کیا گیا۔قذافی اسٹیڈیم کے ڈبل ڈیکر بس ٹرمینل پر ہمدرد نونہال اسمبلی کے بچے، ان کے والدین اور اساتذہ خوشی اور جوش و خروش کے ساتھ جمع ہوئے۔ مقررہ وقت پر یہ منفرد مطالعاتی سفر شروع ہوا اور ڈبل ڈیکر بس لاہور کی تاریخی شاہراہوں پر رواں دواں ہو گئی۔بلند مقام سے شہر کے دلکش مناظر شرکاء کے لیے یادگار تجربہ بن گئے، جبکہ پورے سفر کے دوران ہمدرد کی پہچان، اس کی مثبت برانڈنگ اور مہمان نوازی ہر قدم پر نمایاں رہی۔راہِ سفر میں شرکاء کی تواضع روح افزاء سے کی جاتی رہی، جس نے اس خوشگوار سفر کو مزید تازگی اور شادابی عطا کی۔ڈبل ڈیکر بس میں مختصر پروگرام کی نظامت فریحہ بابر نے کی۔ سفر کا آغاز قاریہ عائشہ حنیف کی پرسوز تلاوتِ کلامِ پاک سے ہوا، جس کے بعد ابنِ علی نے بارگاہِ رسالت مآب ﷺ میں نعتِ رسولِ مقبول پیش کرنے کی سعادت حاصل کی۔ایک ننھی طالبہ نے علامہ محمد اقبال کے فکر انگیز اشعار سنا کر حاضرین سے بھرپور داد وصول کی، جبکہ بعد ازاں اقبال شناسی پر مبنی دلچسپ کوئز مقابلہ منعقد ہوا۔ درست جوابات دینے والے بچوں کو ہمدرد کی گھریلو مصنوعات بطور انعام پیش کی گئیں، جس سے بچوں کا جوش و جذبہ مزید بڑھ گیا۔اس فکری اور تعلیمی سفر کا پڑاؤ تاریخی فوڈ اسٹریٹ تھا، جہاں عظیم الشان بادشاہی مسجد کا دلکش منظر شرکاء کو اپنی جانب متوجہ کر رہا تھا۔بعد ازاں شرکاء نے شاعرِ مشرق علامہ محمد اقبال کے مزار پر حاضری دی، فاتحہ خوانی کی، دعا کی، اور خراجِ عقیدت پیش کرتے ہوئے کلامِ اقبال بھی پڑھا۔اس کے بعد اقبال ہال میں ایک باوقار نشست منعقد ہوئی۔ اس موقع پر ڈائریکٹر اقبال اکیڈمی ڈاکٹر عبدالرؤف رفیقی نے نہایت مؤثر انداز میں علامہ محمد اقبال اور شہید حکیم محمد سعیدؒ کی قومی، فکری اور تعلیمی خدمات کو خراجِ تحسین پیش کیا۔انہوں نے کہا کہ علامہ اقبال نے خودی، علم، کردار اور عمل کا پیغام دیا، جبکہ شہید حکیم محمد سعیدؒ نے انہی افکار کو عملی شکل دیتے ہوئے تعلیم، صحت، اخلاق اور نوجوان نسل کی کردار سازی کو اپنی زندگی کا مقصد بنایا۔ آج ہمدرد پاکستان اسی روشن مشن کو آگے بڑھاتے ہوئے نئی نسل میں علم، شعور اور خدمتِ انسانیت کے جذبے کو فروغ دے رہا ہے۔تقریب کے اختتام پر اس عزم کا اعادہ کیا گیا کہ محترمہ سعدیہ راشد کی سربراہی میں ہمدرد پاکستان مستقبل میں بھی ایسی فکری، ادبی اور تعلیمی سرگرمیوں کا انعقاد جاری رکھے گا، تاکہ نوجوان نسل علامہ اقبال کے افکار اور شہید حکیم محمد سعیدؒ کے روشن وژن سے رہنمائی حاصل کرتے ہوئے پاکستان کے بہتر مستقبل کی تعمیر میں اپنا مثبت کردار ادا کر سکے۔