2026 | June | Lahore | Educational Visit to Radio Pakistan Lahore | Hamdard Naunehal Assembly | 4

لاہور۔4- جون 2026؁ ہمدرد فاؤنڈیشن پاکستان کے زیر اہتمام نونہال اسمبلی کے بچوں کا ریڈیو پاکستان لاہور کا معلوماتی دورہ سید علی بخاری ہمدرد فاؤنڈیشن پاکستان کے زیر اہتمام نونہالانِ وطن کی ذہنی آبیاری، کردار سازی اور اعتماد سازی کے حوالے سے ہر ماہ پاکستان کے مختلف شہروں میں ہمدرد نونہال اسمبلی کے اجلاس منعقد کیے جاتے ہیں۔ گرمیوں کی تعطیلات کے موقع پر ماہِ جون میں پاکستان کے قومی ورثے اور تاریخی مقامات کے معلوماتی دوروں کا بھی اہتمام کیا جاتا ہے۔ اسی سلسلے میں اس بار ریڈیو پاکستان لاہور کا مطالعاتی دورہ کرایا گیا جہاں نونہالانِ وطن کو ریڈیو پاکستان کے نشریاتی نظام، مختلف شعبہ جات اور ابلاغی کردار سے آگاہ کرنے کے لیے ایک نہایت مفید اور معلوماتی نشست منعقد ہوئی۔اس موقع پر ریڈیو پاکستان لاہور کے اسٹیشن ڈائریکٹر جناب راحیل سہیل بسرا، سینئر پروگرام مینیجر جناب ڈاکٹر سید جاوید حسین شاہ اور معروف فنکار ثروت علی خان نے میزبانی کے فرائض انجام دیے۔ پروگرام کا آغاز قاریہ عائشہ حنیف کی تلاوتِ کلامِ پاک سے ہوا جبکہ دعا قاسم نے نعتِ رسولِ مقبول? پیش کرنے کی سعادت حاصل کی۔ ہمدرد نونہال اسمبلی کی اسپیکر فریحہ بابر نے نظامت کے فرائض انجام دیے جبکہ قائدِ ایوان ہانیہ فاطمہ، ڈپٹی اسپیکر ربیعہ مظہر، فاطمہ شہباز، زنیبہ عمر اور دیگر طلبہ و طالبات نے اپنے خیالات کا اظہار کیا۔اس موقع پر راقم نے ہمدرد فاؤنڈیشن پاکستان کی جانب سے منتظمین کا نونہالانِ وطن کو معلوماتی وزٹ کرانے پر شکریہ ادا کیا۔ اپنے خطاب میں سینئر پروگرام مینیجر ڈاکٹر سید جاوید حسین شاہ نے ریڈیو پاکستان کے قیام، اغراض و مقاصد اور نشریاتی نظام کے حوالے سے تفصیلی بریفنگ دی۔ انہوں نے بتایا کہ ریڈیو پاکستان 14 اگست 1947؁ء کو قیامِ پاکستان کے ساتھ ہی وجود میں آیا اور یہ ادارہ نہ صرف پاکستان کی آواز بلکہ قومی ثقافت، زبان اور شناخت کی علامت بھی ہے۔انہوں نے کہا کہ ریڈیو پاکستان کا بنیادی مقصد عوام کو مستند خبریں، تعلیمی و ثقافتی پروگرام اور معیاری تفریح فراہم کرنا ہے۔ آج جدید انٹرنیٹ اور موبائل ٹیکنالوجی کے ذریعے دنیا بھر میں لوگ ریڈیو پاکستان کے مختلف چینلز سن سکتے ہیں۔ ریڈیو پاکستان میں پروگرام ونگ، انجینئرنگ، اکاؤنٹس اور ایڈمنسٹریشن سمیت مختلف شعبے کام کرتے ہیں جبکہ پروگرام ونگ میں تلاوت، نعت، خبریں، انٹرویوز، ڈرامے، کھیل، صحت، ثقافت اور تفریحی پروگرام تیار کیے جاتے ہیں انہوں نے مزید بتایا کہ ریڈیو پاکستان ہمیشہ پاکستانی ثقافت، قومی اقدار اور معیاری خاندانی روایات کو فروغ دیتا ہے جبکہ قومی ایمرجنسی، جنگوں، زلزلوں اور سیلاب جیسی صورتحال میں بھی عوام اورحکومت کے درمیان مؤثر رابطے کا کردار ادا کرتا رہا ہے۔ حالیہ پاک بھارت جنگ میں سوشل میڈیا پر پھیلنے والی جھوٹی خبروں اور منفی پروپیگنڈے کے مقابلے میں بھی ریڈیو پاکستان نے ذمہ دار صحافت اور مستند معلومات کی فراہمی کے ذریعے اپنی اہمیت کو برقرار رکھا ہے شرکاء نے اس معلوماتی نشست کو نہایت مفید قرار دیتے ہوئے اس عزم کا اظہار کیا کہ وہ مستقبل میں بھی قومی اداروں، ثقافت اور مثبت اقدار کے فروغ کے لیے اپنا کردار ادا کرتے رہیں گے۔ملی نغمے پر اس شاندار نشست کا اختتام ہوا اور بعد ازاں ریڈیو پاکستان کے مختلف شعبوں کا وزٹ کرایا گیا۔