WANANCHI WAWAKATAA WENYEVITI WA SERIKALI ZA MITAA

Mkutano wa Kata kwa ajili ya kujadili shughuli za maendeleo katika Kata ya Heru Juu Halmashauri ya Mji Kasulu mkoani Kigoma umevunjika baada ya wananchi wa kata hiyo kutokuwa na imani na wenyeviti wa serikali za mitaa na kupinga uwepo wao katika mkutano huo. Hatua hiyo ni baada ya wenyeviti wa serikali za mitaa katika Kata ya Heru Juu kudaiwa kujiamulia mambo kwa kususia mikutano iliyopita wakiwa na kusudi la kutompatia ushirikiano Diwani wa Kata ya Heru Juu Gilbert Isambe (Chief Mtware), ambaye anatokana na chama kingine. Kitendo hicho hakikuwafurahisha wananchi hao ambao kwenye mkutano wa hivi karibuni kabisa wamewakataa wenyeviti hao wakitaka waondolewe kabla ya mkutano huo kuendelea ama wawaombe radhi, kwa kitendo cha kuwasaliti wananchi waliowachagua na kukwamisha maendeleo ya kata yao. Afisa Mtendaji wa Kata ya Heru Juu Habili Shwaibu, akalazimika kusimama kutoa ufafanuzi kuwa yeye hana mamlaka ya kuwaondoa wenyeviti hao mkutanoni au kuwavua nyadhifa zao, huku baadhi ya wananchi wakiwemo viongozi wastaafu wakionya kuwa Kata ya Heru Juu haitapiga hatua kimaendeleo ikiwa hali itaendelea katika mwelekeo wa sasa. Baada ya shinikizo la kuwataka waondoke mkutanoni au waombe radhi kuzidi, wenyeviti wanaolalamikiwa wakasimama kwa ajili ya kutoa neno lakini tayari wananchi walikuwa wameshafanya maamuzi; hawakupewa tena nafasi hiyo na mkutano ukavunjika.