Khit Thit Morning News | 14 July 2026

Khit Thit သတင်းဌာန၏ ဇူလိုင် ၁၄ ရက် မနက်ပိုင်း ရုပ်သံသတင်းအစီအစဉ် By ရန်ကုန်ခေတ်သစ် ဒီကနေ့ ဇူလိုင် ၁၄ ရက် မနက်ပိုင်း တင်ဆက်ပေးမယ့် သတင်းတွေကတော့ -အကြမ်းဖက် စစ်ခေါင်းဆောင် မင်းအောင်လှိုင်က ရက် ၁၀၀ စီမံချက်နဲ့ နိုင်ငံခြားငွေချွေတာရေး၊ သွင်းကုန်ပိတ်ဆို့ ထိန်းချုပ်ရေးတွေကိုလုပ်နေတယ်လို့ ပြောဆိုထားပေမယ့် လက်တွေ့မှာတော့ မင်းအောင်လှိုင်ရဲ့ သား အောင်ပြည့်စုံ၊ သမီး ခင်သီရိသက်မွန်တို့နဲ့ နီးစပ်တဲ့အသိုင်းအဝိုင်းတွေက လျှပ်စစ်မော်တော်ယာဉ် (EV) တွေကို ဆက်တိုက်တင်သွင်းခွင့်ရရှိနေတယ်လို့ နေပြည်တော်စစ်ဘက်သတင်းရင်းမြစ်တွေနဲ့ UMFCCI စီးပွားရေးသတင်းရင်းမြစ်တွေက ပြောပါတယ်။ မကွေးတိုင်း၊ ဆောမြို့နယ် ပုံတောင်နတ်ထိပ်ကနေ ကျောက်ထုမြို့ဘက်ကိုဆင်းလာတဲ့ စစ်ကောင်စီစစ်ကြောင်းကို ဇူလိုင် ၁၂ ရက်နေ့က တော်လှန်ရေးပူးပေါင်းတပ်ဖွဲ့တွေ ကြားဖြတ်တိုက်ခိုက်ခဲ့ရာ စစ်သား ၁၀ ဦးခန့် သေဆုံးခဲ့ပြီး အရှင်ဖမ်းဆီးရမိသူတွေလည်း ရှိတယ်လို့ ဒေသစစ်ရေးသတင်းရင်းမြစ်တွေက ပြောပါတယ်။ -အာဆီယံအနေနဲ့ မြန်မာ့အရေးမှာ လက်ရှိရင်ဆိုင်နေရတဲ့ အဓိကစိန်ခေါ်မှုဟာ သံတမန်ရေးရာ ထိတွေ့ဆက်ဆံမှု မရှိတာကြောင့် မဟုတ်ဘဲ၊ စစ်ကောင်စီက ကိုယ်တိုင်သဘောတူလက်ခံထားတဲ့ အာဆီယံဘုံသဘောတူညီချက် ၅ ချက်ကို အကောင်အထည်ဖော်ဖို့ ဆက်တိုက်ငြင်းဆန်နေတာကြောင့် ဖြစ်တယ်လို့ အမျိုးသားညီညွတ်ရေးအစိုးရ NUG က ပြောကြားလိုက်ပါတယ်။ အမေရိကန်နဲ့ အီရန်တပ်ဖွဲ့တွေကြား ဒုံးကျည်နဲ့ ဒရုန်းအသုံးပြုတိုက်ခိုက်မှုတွေ ပိုမိုပြင်းထန်လာနေပြီး အီရန်ဘက်ကလည်း ပင်လယ်ကွေ့ဒေသအတွင်းက အမေရိကန်စစ်ရေးပစ်မှတ်တွေကို တိုက်ခိုက်မှု တိုးမြှင့်လာတဲ့ သတင်းအပါအဝင် မနက်ခင်းသတင်းတွေကို တင်ဆက်ပေးပါမယ်။