Mhatre Home Ganpati | Cinematic Highlight | 2023 | Parag Sawant

|| शिव-गजमुख मंदिर || संपूर्णतः पर्यावरण पुरक आरास Made of Eco friendly n Recyclable Material संकल्पना तिन्ही लोकांना त्रस्त करणार्‍या असुरांना आपल्या परशूचं पाणी पाजून बाल गणेश आपल्या मंदिरात परतण्यासाठी निघाला. मनात खात्री होतीच की आपले बाबा शंभू महादेव आपलं कौतुक करण्यासाठी नक्की भेटायला येणार.*त्यामुळं स्वारी थोडीशी घाईतच होती. आल्या आल्या विश्वकर्म्याला बोलावणं धाडलं. बाबांच्या स्वागतासाठी बाप्पाने आपल्या मंदिरात त्याला काही बदल करायला लावले. गोमुखे आली, त्यातून पाण्याची संततधार सुरू झाली. बसण्यासाठी बाबांसारखंच आसन आलं. मंदिराचे खांब हेमाडपंती झाले. प्रकाशाचा लखलखाट कमी करण्यात आला. बाबांना आवडेल असं गांभीर्य जाणीवपूर्वक आणलं गेलं. कलेची देवता म्हणून आपली कला योग्य त्या ठिकाणी कशी दाखवता येईल याचा विचार करून बाप्पाने मंदिराचं छत स्वतः सजवलं. त्यात नाजूक नक्षीदार दिवे त्यानं लावले. सरतेशेवटी आपण स्वतः बाबांना कोणत्या रुपात सामोरं जायचं हा प्रश्न आलाच. बाबांसमोर चार हात घेऊन जायचा प्रश्नच नव्हता. ते सगळं आपल्या भक्तांना धीर यावा यासाठी करायचं असतं. मग काय बरं करावं? त्यांनी आपल्याला दिलेल्या गजमुख रुपातच सामोरं जाऊ हा बालहट्ट मनी उपजला आणि आपल्या मूळ स्वरूपातच बाबांना सामोरं जायचं बाप्पाने ठरवलं. झालं. अपेक्षेप्रमाणे बाबा आले. त्यांनी पुत्राचं पोटभर कौतुक केलं, भरभरून आशीर्वाद दिले आणि आपल्या अस्तित्वाचं कवच मागे ठेवून बाबा आले तसे निघूनही गेले. बाल गणेशाचा अल्लडपणा मात्र होता तसाच राहिला. आपल्याला आकर्षित करणार्‍या बाबांच्या वस्तू हलकेच बाबांना खबरही लागू न देता त्याने आपल्या मंदिरात लपवून ठेवल्या. बाबांचा त्रिशूळ, त्यांचा शंख आणि त्यांचा डमरू. गाण्याबजावण्याचा शौक त्यांच्याचकडूनच तर आलाय की नाही? पण या सगळ्या गडबडीत आपला परशू तसाच आपल्या हातात राहून गेलाय हे बाबा गेल्यावरच बाल गणेशाच्या लक्षात आलं आणि तो तसाच आसनावर जाऊन विसावला.