Alalá nº 126 "Bartolo" - TVG

Alalá nº 126 "Bartolo" - TVG Emisión en Televisión de Galicia: 1 de decembro do 2009 Lugar: Santiago Hai dúas cousas que enchen de orgullo a Bartolo. Unha é que ó longo da súa vida leva feito como el di milleiros de gaiteiros. E outra é a súa familia. Unha familia volcada na música tradicional. Veredes: Bartolo é un dos grandes gaiteiros de Compostela, pero ademais é artesán e mestre de gaita. A súa muller, Rita, foi primeira bailarina en Cantigas e Agarimos e a encargada de vestir as gaitas que el facía. Os fillos tamén tocan e bailan e ademais, a filla é a presidenta da Asociación do Traxe Galego. Os netos tamén andan nisto. E ata a nora e o xenro, e os mozos e mozas dos netos. En fin que, na casa de Bartolo, o que non saiba tocar ou bailar non pasa a proba. Así que imaxinade como serán as festas que fan. No Alalá de hoxe imos asistir a unha desas festas. E ademais estaremos cos alumnos de Bartolo, e verémolo tocar na catedral no Día do Traxe Galego, e cos seus compañeiros de partida, e veremos cómo cambiou Santiago desde que el era un pequeno que xogaba nas corredoiras da Muíña e ó redor da capela de San Lázaro. Daquela, para os de Compostela, o barrio onde el vivía era a aldea, pero hoxe está cheo de hoteles e consellerías.