Khit Thit Morning News | May 23, 2026

Khit Thit သတင်းဌာန၏ မေ ၂၃ ရက် မနက်ပိုင်း ရုပ်သံသတင်းအစီအစဉ် By ရန်ကုန်ခေတ်သစ် ဒီကနေ့ မေ ၂၃ ရက် မနက်ပိုင်း တင်ဆက်ပေးမယ့် သတင်းတွေကတော့ -မြန်မာ့အရေးနဲ့ပတ်သက်ပြီး အာဆီယံ ၁၀ နိုင်ငံက နိုင်ငံခြားရေးဝန်ကြီးတွေက မေလ ၂၁ ရက်နေ့မှာ အွန်လိုင်းဗီဒီယို ကွန်ဖရင့်စနစ်နဲ့ အစည်းအဝေးခေါ်ယူ ဆွေးနွေးခဲ့ကြပြီး မြန်မာနိုင်ငံမှာ လက်ရှိဖြစ် ပေါ်နေတဲ့ နိုင်ငံရေးနဲ့ စစ်ရေးအကျပ်အတည်းတွေကို ဖြေရှင်းနိုင်ရေး၊ အကြမ်းဖက်မှုတွေ ရပ်တန့်ရေးနဲ့ အားလုံးပါဝင်တဲ့ တွေ့ဆုံဆွေးနွေးပွဲတစ်ရပ် ပေါ်ပေါက်လာစေရေးကို တွန်းအားပေးသွားဖို့ သဘောတူခဲ့ကြောင်း ကမ္ဘောဒီးယားအခြေစိုက် Khmer Times က ဖော်ပြပါတယ်။ စစ်ကိုင်းတိုင်း အင်းတော်မြို့နယ်က စီပိန်းရွာကို KIA ပူးပေါင်းတပ်တွေက မေလ ၂၁ ရက်နေ့မှာ တိုက်ခိုက်သိမ်းပိုက်နိုင်ခဲ့ပြီး စစ်ကောင်စီတပ်ဘက်က ထိခိုက်သေဆုံးမှုများပြားသလို လက်နက်ခဲယမ်း အများအပြားကိုလည်း သိမ်းဆည်းရရှိခဲ့ကြောင်း KIA စစ်ရေးသတင်းရင်းမြစ်က ပြောပါတယ်။ မကွေးတိုင်း မင်းတုန်းမြို့နယ်အတွင်း သရက်-မင်းတုန်းလမ်းမကြီးပေါ်မှာ စစ်ကောင်စီတပ် စစ်ကြောင်းတွေ အင်အားအလုံးအရင်းနဲ့ ထိုးစစ်ဆင်လာနေပြီး တော်လှန်ရေးတပ်ဖွဲ့တွေက အဲဒီစစ်ကြောင်းတွေကို ဖြတ်တောက်တိုက်ခိုက်နေတာကြောင့် ပြည်သူတွေအနေနဲ့ ဒီလမ်းပိုင်းကို အသုံးမပြုကြဖို့နဲ့ လက်နက်ကြီးရန်၊ လေကြောင်းရန်တွေကို အထူးသတိထားကြဖို့ သရက်ခရိုင်အမှတ် ၄ တပ်ရင်းက အရေးပေါ် သတိပေးထုတ်ပြန်ထားပါတယ်။ ရုရှားသမ္မတ ဗလာဒီမာပူတင်နဲ့ ဘီလာရုစ်သမ္မတတို့ဟာ ဗီဒီယိုကွန်ဖရင့် ကနေတစ်ဆင့် နှစ်နိုင်ငံပူးတွဲ နျူကလီးယားစစ်ရေးလေ့ကျင့်မှုကို စောင့်ကြည့်ခဲ့ကြတယ်လို့ ရုရှားသတင်းတွေမှာ ဖော်ပြထားကြတဲ့ သတင်းအပါအဝင် မနက်ခင်းသတင်းတွေကို တင်ဆက်ပေးပါမယ်။