Աստված կա Astvats ka

Աստված կա Astvats ka Խոսքը՝ Հովհաննես Շիրազի Երաժշտությունը և կատարումը՝ ԱԲ Ստեղծումն ու խմբագրումը՝ PASA Studio Երգը ստեղծվել է Հովհաննես Շիրազի քառյակների հիման վրա։ * * Չէ, ով լինի, ով չլինի՝ տիեզերքում մեկը կա, . Քանի կյանք կա՝ Աստված էլ կա, քանի մահվան տեգը կա, Առանց գլխի մարմին չկա, հավատում եմ անհայտին,  Թեկուզ անտես, հավերժապես մշտագաղտնի ղեկը կա։ Ախ, Աստված իմ, թե ցնորք ես՝ անապատը ո՞վ է երկնել, Դաշտի ծիլը, ծովի բիլը, աստղ-Հրատը ո՞վ է երկնել, Ո՞վ է սերմում մատաղ սրտում սրտեր երկնող սերմը սիրո, Հայոց հավերժություն երկնող Արարատը ո՞վ է երկնել։ Վարդի լեզուն իր բուրմունքն է, անլեզու չէ սարդն անգամ, Կա, թե՞ չկա, Աստծո մասին հարցնում է վարդն անգամ, Մարդն էլ վարդիցն է հարցնում, ապշած վարդի հրաշքով,- Աստծո հարցում վարդ է անգետ ամենագետ մարդն անգամ։ Ինչքան ասեն Աստված չկա, ավելի եմ հավատում, Թեև չկա ոչ մի վկա, բայց էլի եմ հավատում,- Տիեզերքը հյուսող հրաշքն այնքան է վեհ ու գաղտնի, Այնքան անդուռ, որ աներկբա վշտով լի եմ հավատում… Ինչպե՞ս ատեմ իմ Աստծուն, երբ ինձ այսպես է ծնել, Ինձ բանաստեղծ ստեղծելիս՝ յոթը գիշեր չի քնել,- Թե մոռանամ ստեղծողիս՝ թող բերանս մոռանամ, Հավատն ինչպես մորս կաթը իմ արյան մեջ է բնել։ Մի հարցնի, կա՞, թե չկա. այս առեղծվածն ինչպե՞ս մեկնել, Ո՞վ է երկնել արևն հսկա, ողջ տիեզերքն ո՞վ է երկնել։ Օ՜, մի ասեք Աստված չկա՝ չկան չեմ էլ ուզում կրկնել... Չեմ էլ ուզում լսել չկան՝ իմ ծով խիղճն է Աստծո վկան։