လောင်းလုံးနယ်တိုက်ပွဲ စစ်တပ် အထိနာ ဆုတ်ခွာ | People's Spring

ဒေါ်အောင်ဆန်းစုကြည်ရဲ့သတင်းအစအန ဘာမှမသိရဘူးလို့ KIA ပြော ဇွန်-၂၁၊ ၂၀၂၆။ People’s Spring လူထုခေါင်းဆောင် ဒေါ်အောင်ဆန်းစုကြည်ကို အာဏာသိမ်းစစ်တပ်က စတင်ဖမ်းဆီးထားစဉ်ကတည်းက သတင်းအစအနတွေ ဘာမှမကြားရကြောင်း ကချင်လွတ်လပ်ရေးအဖွဲ့(KIO/KIA) သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက ပြောကြားပြီး ဒီလို သတင်းအစအန မကြားရလို့ ပြည်သူတွေက ဒေါ်အောင်ဆန်းစုကြည်ရဲ့ အသက်အန္တရာယ်ကို စိုးရိမ်နေကြရတာလို့ ပြောပါတယ်။ ဇွန်လ ၁၉ရက်မှာ ကျရောက်တဲ့ ဒေါ်အောင်ဆန်းစုကြည်ရဲ့ (၈၁)နှစ်မြောက် မွေးနေ့မှာ ပြည်တွင်း၊ ပြည်ပ ပြည်သူတွေ၊ အဖွဲ့အစည်းတွေက ဒေါ်အောင်ဆန်းစုကြည် မွေးနေ့ ဆုတောင်းတာ၊ အမြန်ဆုံးလွတ်မြောက်ဖို့ တောင်းဆိုဆန္ဒပြုတာတွေ ပြုလုပ်ခဲ့တဲ့ အခြေအနေ၊ စစ်အုပ်စုက ဒေါ်အောင်ဆန်းစုကြည်ကို ဖျောက်ဖျက်ထားတဲ့ အခြေအနေတွေနဲ့ ပတ်သက်ပြီး ဗိုလ်မှူးကြီးနော်ဘူကို မေးမြန်းရာ အခုလို ပြောကြားခဲ့တာပါ။ ဒေါ်အောင်ဆန်းစုကြည်နဲ့ ပတ်သက်လို့ ဘာသတင်းအချက်အလက်တွေ မကြားသိရဘဲ စတင် ဖမ်းဆီးထားတဲ့ ၂၀၂၁ကနေ ဒီနေ့အထိ ဘာသတင်းအစအနမှ မကြားရတဲ့အတွက် သူ့ရဲ့ အသက်အန္တရာယ်ကိုတော့ ပြည်သူလူထု တော်တော်များများကတော့ စိုးရိမ်ကြတာကို ကြားသိရကြောင်း ဗိုလ်မှူးကြီးနော်ဘူက ပြောပါတယ်။ ဒါပေမဲ့ နိုင်ငံရေးဘက်က ကြည့်မယ်ဆိုရင်တော့ ဒေါ်အောင်ဆန်းစုကြည် အသက်ရှင်တာပဲ ဖြစ်ဖြစ်၊ မရှင်တာပဲ ဖြစ်ဖြစ် လုပ်သင့်လုပ်ထိုက်တဲ့ နိုင်ငံရေး၊ လုပ်ရမယ့် အစီအစဉ်တွေ၊ နိုင်ငံရေးနဲ့ ပတ်သက်လို့ကတော့ ဆက်လုပ်ရမှာ ဖြစ်သလို ဆက်လုပ်ဖို့လည်း လိုအပ်တယ်လို့ KIA ပြောရေးဆိုခွင့်ရှိသူက ဆကပြောပါတယ်။ ဒေါ်အောင်ဆန်းစုကြည်ရဲ့မွေးနေ့ကို KIO/KIA နယ်မြေမှာ ရောက်နေတဲ့ ဒေါ်အောင်ဆန်းစုကြည်ကို ချစ်ခင်လေးစားသူတွေ့ လုပ်ဆောင်ခဲ့တာ အရင်ကလည်း ရှိသလို ဒီနှစ်မွေးနေ့မှာလည်း ရှိပါတယ်။ လိုင်ဇာဒေသရှိ ကချင်ပြည်နယ်ပညာရပ်စုံတက္ကသိုလ်(KSCU) ရဲ့ ဆေးပညာသိပ္ပံတက္ကသိုလ်မှာ လူထုခေါင်းဆောင်ဒေါ်အောင်ဆန်းစုကြည်ရဲ့ ၈၁နှစ်မြောက် မွေးနေ့ပွဲ ကျင်းပခဲ့ကြောင်း KSCU ဆေးပညာသိပ္ပံ တက္ကသိုလ်ရဲ့ ကျောင်းအုပ်ကြီး ဒေါက်တာခင်မောင်လွင်က မှတ်တမ်းဓာတ်ပုံတွေ ဖော်ပြအသိပေးပါတယ်။ ဒေါ်အောင်ဆန်းစုကြည် ကျန်းမာဖို့နဲ့ မတရားအချုပ်အနှောင်ကနေ အမြန်ဆုံးလွတ်မြောက်ဖို့ ဒေါက်တာခင်မောင်လွင်က ဆုတောင်းပေးထားပါတယ်။ KSCU ဟာ စစ်တပ်အာဏာသိမ်းပြီးနောက် အမျိုးသားညီညွတ်ရေးအစိုးရ(NUG)နဲ့ ကချင်လွတ်လပ်ရေးအဖွဲ(KIO)တို ပူးပေါင်းဖွင့်လှစ်ခဲ့တဲ့ မြေပြင် တက္ကသိုလ်တစ်ခုဖြစ်ပါတယ်။ ဒေါ်အောင်ဆန်းစုကြည်ရဲ့ မွေးနေ့ပွဲ ကျင်းပတာ၊ ဆုတောင်းပေးတာ ဒေါ်အောင်ဆန်းစုကြည်နဲ့အတူ ရပ်တည်တာအပေါ် ကျေးဇူးတင်ကြောင်း သားဖြစ်သူ ကင်မ်အဲရစ် ခေါ် ကိုထိန်လင်းက ပြောကြားခဲ့ပါတယ်။ ဒါ့အပြင် ဒေါ်အောင်ဆန်းစုကြည်လို ကမ္ဘာသိပုဂ္ဂိုလ်ကို စစ်အုပ်စုဖျောက်ဖျက်ထားဝံ့လို့ သောင်းချီတဲ့ စစ်အုပ်စုလက်ထဲက နိုင်ငံရေးအကျဉ်းသားတွေအတွက် အလွန်အန္တရာယ်ကြီးနေကြောင်းလည်း ကိုထိန်လင်းက ထောက်ပြပါတယ်။ ===== လောင်းလုံးနယ်တိုက်ပွဲ စစ်တပ် အထိနာ ဆုတ်ခွာ ဇွန်-၂၁၊ ၂၀၂၆။ People’s Spring တနင်္သာရီတိုင်း၊ လောင်းလုံးမြို့နယ် စစ်ဗြဲ ခေါ် စပ်ပြဲကျေးရွာတိုက်ပွဲမှာ စစ်တပ်က အထိနာ ဆုတ်ခွာထွက်ပြေးသွားပြီး ရုပ်အလောင်းတွေနဲ့ လက်နက်ခဲယမ်းအချို့ သိမ်းရခဲ့ကြောင်း လောင်းလုံးမြို့နယ် ပြည်သူ့ကာကွယ်ရေးအဖွဲ့(ပကဖ)က ဇွန်လ ၂၀ရက် မနေ့က သတင်းထုတ်ပြန်ပါတယ်။ စပ်ပြဲရွာအတွင်း ဝင်ရောက်တပ်စွဲထားတဲ့ စစ်တပ် စစ်ကြောင်းကို တော်လှန်ရေးပူးပေါင်းတပ်က ပြီးခဲ့တဲ့ ဇွန်လ ၁၄ရက်မှာ တိုက်ခိုက်ခဲ့ရာ ဇွန်လ ၁၅ရက် မနက်အထိ တိုက်ပွဲတွေ ဖြစ်ပွားခဲ့တာပါ။ တိုက်ပွဲအတွင်း စစ်တပ်က အထိနာလို့ ထားဝယ်မြို့ပေါ်ကနေ ဟောင်ဝစ်ဇာအမြောက်နဲ့ ပစ်ကူပေးခဲ့သလို လောင်းလုံးမြို့ပေါ်နဲ့ လက်ခတ်တောင် တာဝါတိုင်စခန်းကလည်း ပစ်ကူပေးခဲ့ကြောင်း ဖော်ပြပါတယ်။ တိုက်ပွဲအပြီး စစ်တပ်ရဲ့ ရုပ်အလောင်း ၇လောင်း သိမ်းရခဲ့ပြီး အရာရှိ ၂ဦး အပါအဝင် ၆ဦး ဒဏ်ရာရရှိတာကို အတည်ပြုနိုင်ခဲ့တယ်လို့ ထုတ်ပြန်ပါတယ်။ သိမ်းရခဲ့တဲ့ လက်နက် ၁လက်နဲ့ ကျည်ခဲယမ်းတွေရဲ့ မှတ်တမ်းပုံနဲ့ စစ်တပ် အလောင်းပုံတွေလည်း ဖော်ပြထားပါတယ်။ ဒါ့အပြင် စစ်တပ်ဘက်က ထိခိုက်သေဆုံး အရေအတွက် အခုထက်ပိုနိုင်ကြောင်း ထုတ်ပြန်ခဲ့ပြီး တော်လှန်ရေးပူးပေါင်းတပ်ကလည်း ရဲဘော် ၃ဦး ဒဏ်ရာရရှိခဲ့ကြောင်း အသိပေးပါတယ်။ စပ်ပြဲရွာ စစ်ဆင်ရေးကို ပြည်သူ့ကာကွယ်ရေးတပ်မတော်၊ တနင်္သာရီတိုင်းစစ်ဌာန ထားဝယ်ခရိုင်အမှတ်(၁)တပ်ရင်းက ဦးစီးပြီး ဒေသတွင်းက တော်လှန်ရေးတပ်ဖွဲ့တွေ ပူးပေါင်းတိုက်ခိုက်ခဲ့ကြောင်း ထုတ်ပြန်ပါတယ်။ လောင်းလုံးမြို့နယ် စပ်ပြဲရွာမှာ ဇွန်လ ပထမပတ်ကလည်း တိုက်ပွဲဖြစ်ပွားခဲ့ပါသေးတယ်။ ဇွန်လ ၃ရက်က စပ်ပြဲရွာအတွင်း တပ်စွဲထားတဲ့ စစ်တပ်နဲ့ တိုက်ပွဲဖြစ်ခဲ့ရာ စစ်တပ် ထိခိုက်သေဆုံးမှုများ ရှိခဲ့ပြီး တော်လှန်ရေးရဲဘော် ၁ဦး ဒဏ်ရာရခဲ့တယ်လို့ သိရပါတယ်။ တိုက်ပွဲဖြစ်တဲ့ စပ်ပြဲရွာက နေအိမ်တွေကိုလည်း အာဏာသိမ်းစစ်တပ်က မီးရှို့ဖျက်ဆီးခဲ့ကြောင်းလည်း ဒေသခံက အသိပေးပါတယ်။ လောင်းလုံးပကဖရဲ့ အသိပေးချက်အရ မေလ ဒုတိယပတ်ကနေ ဇွန်လ ပထမပတ်အတွင်း လောင်းလုံးမြို့နယ်အတွင်း တိုက်ပွဲတွေ တောက်လျှောက်ဖြစ်ခဲ့တယ်လို့ သိရပါတယ်။ ဇွန်လ ၄ရက်မှာလည်း ကမြောကင်းတံတားဘက်က ဆင်းလာတဲ့ စစ်တပ်စစ်ကြောင်းကို လမ်းပိုင်းတနေရာမှာ မိုင်းဆွဲတိုက်ခိုက်ခဲ့ပြီး စစ်တပ်က ထိခိုက်မှုရှိကာ ပြန်ဆုတ်သွားတယ်လို့ ဆိုပါတယ်။ 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 #ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #ဒေါ်အောင်ဆန်းစုကြည် #ကေအိုင်အေ #မြန်မာ့နိုင်ငံရေး #မြန်မာ့သတင်း #ပြည်တွင်းသတင်း #AungSanSuuKyi #KIA #KachinIndependenceArmy #MyanmarPolitics #MyanmarNews #SaveMyanmar #လောင်းလုံးတိုက်ပွဲ #တနင်္သာရီတိုင်း #စစ်ကောင်စီ #ပြည်သူ့ကာကွယ်ရေးတပ်မတော် #မြန်မာ့နွေဦးတော်လှန်ရေး #ပြည်တွင်းစစ်သတင်း #LaunglonBattle #Tanintharyi #MyanmarCivilWar #PDFMyanmar #SpringRevolutionMyanmar #MyanmarNews