ညွှန်းကိန်းများကပြောတဲ့မြန်မာ့စီးပွားရေးကပ်ဆိုက်ခြင်း | People's Spring

ညွှန်းကိန်းများကပြောတဲ့မြန်မာ့စီးပွားရေးကပ်ဆိုက်ခြင်း -ခါကာဘို၊နေ့သစ်/People's Spring ကမ္ဘာ့ဘဏ်(World Bank)ရဲ့ ဇွန်၁၆ရက် အစီရင်ခံစာအရ မြန်မာနိုင်ငံမှာ ငွေကြေးဖောင်းပွမှုက၂၀၂၆ ခုနှစ်အတွင်း၂၅ရာခိုင်နှုန်းနီးပါး အထိ မြင့်တက်လာနေကြောင်း ဖော်ပြထားပါတယ်။ အစီရင်ခံစာအရ ၂၀၂၆ မတ်လမှာကုန်ဆုံးခဲ့တဲ့၁၂ လတာကာလအတွင်း ငွေဖောင်းပွမှုက ၂၁.၁ ရာခိုင်နှုန်းရှိခဲ့ပြီး ဧပြီလမှာတော့ ၂၄.၆ ရာခိုင်နှုန်းအထိ ထပ်တက်လာတာပါ။ ဒါက မြန်မာပြည်သူလူထုရဲ့ စားဝတ်နေရေးကို တစ်ဆင့်ပြီး တစ်ဆင့် ပိုမိုဖိအားပေး မြင့်တက်လာစေပါတယ်။၂၀၂၆ ဧပြီလက အာဏာသိမ်းခေါင်းဆောင်မင်းအောင်လှိုင် က သူ့စိတ်တိုင်းကျလုပ်ထားတဲ့ ရွေးကောက်ပွဲ၊လွှတ်တော်တို့ကနေ သူ့ဘာသာသမ္မတခန့်အပ်တဲ့လဖြစ်ပါတယ်။ အမေရိကန်-အီရန် စွမ်းအင် တင်းမာမှုကြောင့် ဖြစ်ပေါ်လာတဲ့ အရှေ့အလယ်ပိုင်း အကျပ်အတည်း၊ ပြည်တွင်းစစ်နှင့် စစ်အာဏာရှင်အောက်က နိုင်ငံရေး–စီးပွားရေး မတည်ငြိမ်မှုတွေရဲ့ ပေါင်းစပ် သက်ရောက်မှုတွေက ဒီလိုငွေကြေးဖောင်းပွမှု မြင့်တက်ခြင်းရဲ့ အဓိက အကြောင်းရင်းတွေဘဲ ဖြစ်ပါတယ်။ လောင်စာဆီရဲ့ ၉၀ ရာခိုင်နှုန်းခန့်ကို ပြည်ပကနေ မှီခို နေရတဲ့အတွက် ကမ္ဘာ့ရေနံဈေးနှုန်းနဲ့ သယ်ယူပို့ဆောင်ရေး လမ်းကြောင်းတွေ ထိခိုက်တာနဲ့ တပြိုင်နက် ပြည်တွင်းဈေးကွက်ကို တိုက်ရိုက် ရိုက်ခတ်လာပါတယ်။ ဒီလိုအခြေအနေတွေက မြို့ပြဈေးကွက်တွေအပြင် ကျေးလက် စီးပွားရေးကိုပါ အလွန်ပြင်းထန်စွာ ထိခိုက်ပါတယ်။ လယ်သမားတွေဟာ စစ်ရေးမတည်ငြိမ်မှုတွေကြောင့် ရွာတွေကနေ စွန့်ခွာရတာ၊ စစ်ဘေးရှောင်ဘဝရောက်နေရခြင်းတွေကြောင့် လယ်ယာလုပ်ငန်းတွေကို အချိန်မီ မစိုက်နိုင်တော့သလို မျိုးစေ့၊ မြေဩဇာ၊လောင်စာနဲ့ သယ်ယူပို့ဆောင်ရေး စရိတ်တွေ အလွန်မြင့်တက် လာတဲ့အတွက် ထုတ်လုပ်မှု ကုန်ကျစရိတ်ကလည်း မခံနိုင်လောက်အောင် မြင့်တက်သွားပါတယ်။ တစ်ဖက်မှာလည်း စစ်မှုထမ်းဖိအားနဲ့ လုံခြုံရေးမတည်ငြိမ်မှုတွေကြောင့် လူငယ်မျိုးဆက် တစ်ခုလုံး နိုင်ငံပြင်ပကို ထွက်ခွာနေကြတဲ့အတွက် လယ်ယာစိုက်ပျိုးဘို့ လယ်သမားအင်အား သာမက စက်ရုံ၊ အလုပ်ရုံတွေအတွက်ပါ ကြီးမားတဲ့ လူသားအင်အား ပြတ်တောက်မှု ဖြစ်ပေါ်နေပြီး ဒီလိုအခြေအနေက ထုတ်လုပ်ရေးကဏ္ဍကို ပိုမိုကျဆင်း ဆိုးရွားစေပါတယ်။ ဒါ့အပြင် စစ်အုပ်ချုပ်ရေးအောက်က သွင်းကုန်၊ ထွက်ကုန် ကန့်သတ်မှုတွေ၊ လိုင်စင်နဲ့ ကုန်သွယ်ရေး ပိတ်ပင်မှုတွေ တိုးလာနေတာကြောင့် ပြည်တွင်း ဈေးကွက်ထဲမှာ ‌ဆေးဝါးအပါအဝင် အခြေခံ ကုန်ပစ္စည်းတွေ အင်မတန် ရှားပါးလာပြီး ဈေးနှုန်း မတည်ငြိမ်မှုတွေက နေ့စဉ်အသက်ရှင်ရေးကို တိုက်ရိုက် ဖိအားပေးလာပါ‌တော့တယ်။ တစ်ချိန်တည်းမှာပဲ စစ်ရေးပဋိပက္ခနဲ့ စီးပွားရေး မတည်ငြိမ်မှုတွေကြောင့် ပြည်တွင်းပြည်ပ စီးပွားရေးလုပ်ငန်းအများအပြား ပိတ်သိမ်းသွားပြီး အလုပ်အကိုင်ရရှိနိုင်ဖို့ အခွင့်အလမ်းတွေကလည်း သိသိသာသာ လျော့နည်းလာတာမို့ ဒီအခြေအနေတွေက မိသားစုဝင်ငွေကျဆင်းမှု၊အလုပ်လက်မဲ့နှုန်းမြင့်တက်မှုနဲ့ ဆင်းရဲနွမ်းပါးမှုကို တစ်ပြိုင်နက်တည်း တွန်းအားပေးနေပါတယ်။ ကမ္ဘာ့ဘဏ်ကလည်း မြန်မာစီးပွားရေးကို “တိုးတက်မှုမရှိဘဲ အလွန်နိမ့်တဲ့အဆင့်မှာပဲ ရပ်တန့်နေတယ်” လို့ သုံးသပ်ထားပါတယ်။ ၂၀၂၅ ခုနှစ်အတွင်း မြန်မာနိုင်ငံရဲ့ ဆင်းရဲနွမ်းပါးမှုနှုန်းက ၂၉.၉ ရာခိုင်နှုန်းအထိ မြင့်တက်လာပြီး ၂၀၂၁ မတိုင်ခင်ကာလနဲ့ နှိုင်းယှဉ်ရင်တော့ အင်မတန် နိမ့်ကျ ဆိုးရွားနေပါပြီ။ မြို့ပြမိသားစုတွေကလည်း စားဝတ်နေရေးဖိအားကို တိုက်ရိုက် ခံစားနေရပါတယ်။ ရန်ကုန်က မိသားစုတစ်စုက “အစားအသောက်တောင် မလုံလောက်တော့ဘူး၊ ကလေးတွေကို ကျောင်းမပို့နိုင်တော့ဘူး” လို့ ပြောဆိုသလို၊ ဆိုင်ရှင်အမျိုးသမီးတစ်ဦးကလည်း “ဝင်ငွေနဲ့စရိတ်မကိုက်တော့ဘူး၊နေ့တိုင်း အဆင်မပြေမှုနဲ့ပဲရင်ဆိုင်နေရတယ်”လို့ဆိုပါတယ်။ ဒီအခြေအနေတွေကြောင့် မြန်မာနိုင်ငံဟာအခုဆိုရင်ကမ္ဘာပေါ်မှာဆာလောင်မွတ်သိပ်မှုဘေးအပြင်းထန်ဆုံးကြုံနေရတဲ့ နိုင်ငံတွေ စာရင်းမှာ အဆင့် ၆ နေရာကို ရောက်နေတယ်လို့ ဇွန် ၁၉ ရက်မှာ ကုလသမဂ္ဂအထွေထွေအတွင်းရေးမှူးချုပ်ရဲ့ အထူးကိုယ်စားလှယ်ဂျူလီဘစ်ရှော့ကပြောခဲ့ပါတယ် ။ဇွန်လ ၁၉ ရက်နေ့မှာကျင်းပခဲ့တဲ့ကုလသမဂ္ဂ လုံခြုံရေးညီလာခံရဲ့အလွတ်သဘောဆွေးနွေးမှု အစီအစဉ်တစ်ခုမှာ ကုလသမဂ္ဂအထွေထွေအတွင်းရေးမှူးချုပ်ရဲ့ အထူးကိုယ်စားလှယ်က စစ်အာဏာသိမ်းမှု နောက်ဆက်တွဲ မြန်မာနိုင်ငံ အခြေအနေတွေကို တင်ပြခဲ့ရာမှာ ကဏ္ဍပေါင်းစုံက တောက်လျှောက် အဆိုးဖက်ကို ဦးတည်ပြီး ဆုတ်ယုတ် ကျဆင်းလာနေတယ်လို့ ပြောဆိုသွားခဲ့တာပါ။ ငွေကြေးဖေါင်းပွမှုကိုကိန်းဂဏန်းတွေက ဖော်ပြနိုင်ပေမယ့် နိုင်ငံတနိုင်ငံရဲ့ ကျရှုံးမှု၊ ပြည်သူတွေရဲ့ မျှော်လင့်ချက်၊ ဆုံးရှုံးသွားတဲ့ လူငယ်တွေရဲ့ အနာဂတ်နဲ့ ပျောက်ကွယ်သွားတဲ့ အိပ်မက်တွေကိုတော့ ဘယ်ကိန်းဂဏန်းကမှ အပြည့်အဝ ဖော်ပြနိုင်မှာ မဟုတ်ပါဘူး။ အာဏာသိမ်းခေါင်းဆောင်က စီးပွားရေးဖွံ့ဖြိုးအောင် ဘယ်သို့ ဘယ်ပုံလုပ်မယ်လို့ ကြုံးဝါးနေပေမယ့် ဒီအခြေနေမှာ အပြောလွယ်သလောက် လက်တွေ့ခက်လှပါတယ်။ အိန္ဒိယ နဲ့ တရုတ်သွားပြီး ရင်းနှီးမြှပ်နှံမှုတွေ ဖိတ်ခေါ်ပေမယ့် ပြည်သူတွေရဲ့ထောက်ခံမှုမရှိတဲ့ မင်းအောင်လှိုင် အုပ်စုအတွက် တည်ငြိမ်မှုဆိုတာခက်ခဲသလို ပြည်ပရင်းနှီးမြှပ်နှံမှုတိုးလာဖို့ကလည်း အိပ်မက်ပဲဖြစ်နေဦးမှာပါ ။ စီးပွားရေးတိုးတက်အောင်လုပ်တယ်ဆိုတာဟာ စစ်အုပ်စုအတွက်တိုက်လေယာဉ်တွေနဲ့ ပြည်သူတွေကို ဗုံးပတ်ကြဲရတာလို ၊ ရွာတွေကို မီးလိုက်ရှို့ရတာလို လွယ်ကူနေမှာမဟုတ်ပါဘူး။ ။ 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 #ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #မြန်မာ့စီးပွားရေး #ငွေကြေးဖောင်းပွမှု #မြန်မာ့စီးပွားရေးကပ်ဆိုက်ခြင်း #ကမ္ဘာ့ဘဏ်အစီရင်ခံစာ #WorldBankမြန်မာ #စီးပွားရေးညွှန်းကိန်းများ #ကုန်ဈေးနှုန်းကြီးမြင့်မှု #စစ်ကောင်စီနှင့်စီးပွားရေး #မြန်မာ့သတင်း #MyanmarEconomy #MyanmarInflation #EconomicCrisis #WorldBankReport #EconomicIndicators #MyanmarEconomicMonitor #WhatsHappeningInMyanmar #MyanmarCrisis #BurmaEconomy #InflationRate