Ceremonia e çertifikimit për gradën Nënkomisar. 2.Maj.2017

Akademia e Sigurisë çertifikon punonjësit e Policisë që përfunduan kursin e trajnimit për gradën Nënkomisar. Gjatë ditës së sotme në ambientet e Akademisë së Sigurisë, u zhvillua ceremonia e çertifikimit të punonjësve të Policisë që përfunduan kursin e trajnimit për gradën Nënkomisar. Të pranishëm në këtë ceremoni ishin Drejtori Përgjithshëm i Policisë së Shtetit Drejtues Madhor Haki ÇAKO, Drejtori i Akademisë së Sigurisë Drejtues i Lartë Bilbil MEMAJ, Dekani i Fakultetit të Hetimit të Krimit Drejtues i Parë Ilirjan MANDRO, si dhe përfaqësues të tjerë të Policisë së Shtetit. Në fjalën e tij Drejtori i Akademisë së Sigurisë Z.MEMAJ ka vlerësuar kursin intesiv, angazhimin e suksesshëm të gjithë studentëve dhe ka falenderuar gjithashtu të gjithë trupën pedagogjike për punën e tyre. “Për ju sot fillon një betejë tjetër. Ju tashmë jeni menaxherë të vijës së parë, nuk jeni më inspektorë, por kjo është një përgjegjësi e madhe, është një përgjegjësi dyfishe për ju. Nga ana tjetër, ju jeni përsëri studentë. Ju jeni studentë për të mbaruar dhe për t'u diplomuar në Fakultetin e Sigurisë Publike, në Akademinë e Sigurisë. Ndaj në emër të Akademisë ju uroj suksese në punën tuaj dhe në detyrat tuaja të reja”. Drejtori i Përgjithshëm i Policisë së Shtetit Z.ÇAKO ka përgëzuar studentët për këtë arritje të rëndësishme profesionale në jetët e tyre duke theksuar se dijet nuk mbarojnë me shkollën, ato merren gjatë jetës dhe gjatë karrierës . Gjithashtu Z. ÇAKO shprehu rëndësinë e Akademisë së Sigurisë si një institucion që ka për qëllim forcimin e drejtuesve, formimin dhe krijimin e kapaciteteve të reja me njohuri të plota dhe të thella për kryerjen e detyrave policore por edhe për të krijuar bërthamën e qëndrueshme të liderve të suksesshëm në të ardhmen e Policisë. “Më lejoni që në fillim t’ju përgëzoj për këtë arritje të rëndësishmë në jetën tuaj profesionale, t’ju uroj suksese të mëtejshme në detyrën e rëndësishme që do të kryeni. E bashkë me gëzimin e natyrshëm të kësaj arritjeje, vijnë edhe përgjegjësi më të mëdha, detyra dhe angazhime më komplekse, që kërkojnë nga ana juaj, jo vetëm njohuri të thella profesionale por edhe aftësi menaxheriale, për të drejtuar dhe marrë vendime për realizimin e objektivave të vendosura. Do të dëshiroja të theksoja se dijet nuk mbarojnë me shkollën, ato merren gjatë jetës dhe gjatë karrierës, kërkohet vetëm përkushtim dhe vullnet nga ana juaj për të mësuar më të mirën për vete, për të gjithë organizatën dhe për kolegët. Ju e keni fare të qartë se sot, Akademia e Sigurisë por dhe në tërësi të gjithë kapacitetet formuese të saj, japin mundësi për të gjitha mësimet dhe kalimin në nivelin e specializimeve të tjera të cilat së shpejti do të fillojnë edhe për nivele të larta drejtuese dhe do të jeni pikërisht ju, ata të cilët pas përfundimit të plotësimit të afateve kohore do të konkuroni dhe do të mundësoni drejtimin qendror, por pse jo edhe strategjik të Policisë së Shtetit”. Dekani i Fakultetit të Hetimit të Krimit, Drejtues i Parë Ilirjan MANDRO ka përshkruar programin mësimor të trajnimit për Specialistët e Hetimit të Krimit dhe rëndësinë e këtij programi për të formuar specialistë me nivel të lartë profesional dhe me standarte të larta etike profesionale. “Programi synonte të jepte njohuri bazë mbi format, metodat për menaxhimin, si dhe për të trajtuar problematikat teorike dhe praktike në fushën e hetimit të krimit. Qëllimi i trajnimit ishte për formimin e specialistëve me nivel të lartë profesional në fushën e hetimit të krimit me kulturë e dije jo vetëm të nivelit universitar, me standarte të larta etike profesionale dhe njohës të ligjit, misionit, përgjegjësive institucionale të Policisë, por edhe aftësi praktike, shprehi në menaxhimin e situatave të hetimit të krimit”. Gjithashtu në fjalën e saj një Studentja pjesëmarrëse në këtë program Xhulia ZYFI shprehu falenderimet e saj për stafin pedagogjik të Akademisë së Sigurisë dhe suportin e tyre pasi është zhvilluar një mësim intensiv duke patur përkushtimin maksimal dhe gjithashtu duke theksuar se dijet, informacionet, praktikat e mara, do të vendosen në punë me përkushtim dhe korrektesë. Në përfundim të kësaj ceremonie, u shpërndanë çertifikatat përkatëse për studentët pjesëmarrës në program.