افسانہ امرت رس پہلی قسط

افسانہ: اَمرت رَس "فاروقی کا ایک اہم افسانہ "امرت رس" ہے جس کا موضوع مجاز سے حقیقت تک کا سفر ہے_ یہ افسانہ حیدراباد دکن کے اُس کلچر کے پس منظر میں لکھا گیا ہے جس میں ہندوستان کے قبضے سے پہلے آصف جاہی سلطنت میں ہندو اور مسلم اور مسلمان چین کی زندگی بسر کر رہے تھے_ جس میں راگھو اچاریہ جیسے قانونی مشیر مشاعروں قوالی اور مزاروں میں وقت گزارتے تھے، یہ اٌس بھیم راؤ کی کہانی ہے جو کنچا کے عشق میں مبتلا ہو کر گاؤں سے بھاگتا ہے اور شہر میں راگھو اچاریہ کے مشورے سے کنچا سے بھگوان تک کا سفر طے کرتا ہے_ بھیم راؤ کو روپ سے آتما تک کا یہ سفر(جس میں مورتی کا اپمان بھی شامل ہے) موسیقی، شاعری اور تصوف کے سہارے فاروقی نے نہایت مہارت سے طے کرایا ہے اور کنچا کے بول "رے، رے" اس سفر میں جس طرح اس کی مدد کرتے ہیں وہ افسانے کے فن پر فاروقی کی ماہرانہ گرفت کی ایک اچھی مثال ہے_ افسانے کے آخر میں جب گاؤں کے فسادی لوگ مؤذن سالم مٹولے کو گولی مار دیتے ہیں تو بھیم راو جو تلاش حقیقت کا سفر اب تک مکمل کر چکا ہے نامکمل آذان کو مکمل کرنے کے لیے مسجد کے مینار پر چڑھ جاتا ہے اور اسی کوشش میں اپنی جان سے ہاتھ دھو بیٹھتا ہے_ یہ افسانہ اپنے اسلوب کردار نگاری کہانی پن اور مقصدیت کے فنکارانہ امتزاج کی وجہ سے فاروقی کے بہترین افسانوں میں شمار کیا جا سکتا ہے" نورالعین نوید (ماہنامہ سیارہ۱۹۹۱)