SINO ANG NAGPATUMBA KAY MAYOR ANTONIO HALILI?

Kadalasang nakikita ang mga alkalde bilang matitibay na haligi ng kanilang komunidad—mga lantad at matapang na tagapagtanggol ng kapakanan ng kanilang nasasakupan. Subalit para kay Antonio Cando Halili, dating tanyag na alkalde ng Tanauan sa Batangas, binalot ng kontrobersiya ang kaniyang pangalan: mula sa matapang na “Walk of Shame” campaign laban sa mga pinaghihinalaang kriminal, hanggang sa biglang paglitaw ng kaniyang pangalan sa ‘narco-list’ ni Pangulong Rodrigo Duterte. Bumuhos sa kaniya ang papuri at batikos, kasabay ng unti-unting paglutang ng matitinding hinala. Niyanig ang buong bansa nang siya’y barilin sa gitna mismo ng isang flag raising ceremony noong Hulyo 2, 2018, isang eksenang nagbigay ng isang napakalaking balita sa buong bansa na pinuno ng mga tanong at mga espekulasyon: May kinalaman ba dito ang mga makapangyarihang sindikato ng droga, katunggali sa politika, o isang puwersang nais patahimikin ang isang matapang na alkalde? Ilang taon na ring nananatiling hindi nalulutas ang kasong ito—hanggang biglang lumitaw ang isang bagong rebelasyon noong Oktubre 2024, na umano’y nagtuturo sa isang opisyal ng pulisya bilang sangkot sa pagpaslang sa alkalde. Nagsimulang maging mayor ng Lungsod ng Tanauan sa Lalawigan ng Batangas si Antonio Cando Halili noong 1992 at muling nahalal bilang mayor ulit noong 2013 at 2016. Ipinanganak siya noong Pebrero 8, 1946. Bagama’t limitadong pampublikong rekord ang tungkol sa kanyang kabataan at edukasyon, malinaw na bago siya pumasok sa politika ay isa siyang masigasig na negosyante. Siya ang nagtatag at nagmamay-ari ng ANC Halili Group of Companies na sumasaklaw sa iba’t ibang industriya tulad ng: Real Estate, Information Technology, at Private Emission Testing. Ayon sa ilang ulat, mayroon nang higit 60 emission testing centers ang kanyang kumpanya sa Luzon. Ito ay nagpapatunay na lumawak ang kanyang negosyo bago pa man siya ganap na sumabak sa pulitika. Unang nakilala si Halili sa larangan ng lokal na pamamahala nang mahalal siya bilang Mayor ng Lungsod ng Tanauan, Batangas. Isa sa kanyang binigyang-pansin ang kampanya laban sa iligal na droga, kung saan siya ay naging popular—o kontrobersyal—dahil sa tinaguriang “Walk of Shame.” True Crime Tagalog | Tagalog Crime Stories