“Shpella e Plakës” në Librazhd – Legjenda që u bë bujtinë dhe po tërheq turistë nga e gjithë bota

“Shpella e Plakës” në Librazhd – Legjenda që u bë bujtinë dhe po tërheq turistë nga e gjithë bota    • “Shpella e Plakës” në Librazhd – Legjenda ...   #danielmucaku #petritxhepi #xhyre #shpellaeplakes #ejanelibrazhd Realizoi dhe Lexoi: Daniel Muçaku HYRA: Në një udhëkryq mes historisë dhe natyrës, atje ku rruga e lashtë Egnatia prek hijen e Gurrës së Zezë, ndodhet një vend që nuk është thjesht një bujtinë, por një thirrje për të rikthyer lidhjet me rrënjët. E kemi fjalën për “Shpellën e Plakës”, një bujtinë e veçantë në fshatin Xhyrë të Librazhdit, një copëz Shqipërie që po kthehet në destinacion për ata që kërkojnë jo vetëm pushim, por dhe histori, shije dhe ndjenja. Kjo zonë e bukur malore ndan kufirin mes fshatit Dardhë dhe Xhyrë, dy fshatra me një trashëgimi të pasur, ku çdo gur dhe çdo rrëke uji mbart një rrëfim të vjetër. Emri “Shpella e Plakës” nuk është rastësi, është një nderim ndaj një shpelle të famshme aty pranë, e cila prej shekujsh është e mbështjellë me gojëdhëna, me legjenda dhe me kujtime që jetojnë në rrëfimet e të moshuarve të fshatit. Petrit Xhepi, pronari i bujtinës, është vetë nga kjo zonë. Gjatë pandemisë, në vitin 2020, ai mori një vendim që i ndryshoi jetën, por mbi të gjitha, ndryshoi edhe fytyrën e vendlindjes së tij. Fillimisht nisi me hapjen e rrugës drejt shpellës, për të mundësuar që kjo perlë natyrore të ishte e arritshme për të gjithë. E më pas, lindi ideja për të ndërtuar bujtinën aty, nën hijen e arrave shekullore, aty ku historia takon natyrën. Në “Shpellën e Plakës” nuk të mirëpret vetëm natyra, por edhe tryeza. Ushqimi këtu është kthyer në një përvojë më vete. Çdo pjatë është një kujtim nga e kaluara, gatime tradicionale që kanë mbijetuar në kohë. Nga mishi i kecit dhe qingjit në bidon, te mesniku me arra dhe pula e fshatit me pilaf. Nga byreku me barishte të egra, te djathaniku, oshmari, salca e kosit, roshniku dhe buka e ngrohtë e furrës. E gjitha e përgatitur me dashuri dhe përkushtim. Turistët që kanë zbuluar këtë perlë vijnë nga larg, nga Kanadaja, Skocia, Gjermania, Franca, Anglia, Turqia, Danimarka, Hollanda. Por edhe nga Tirana dhe qytetet e tjera të Shqipërisë. Ata vijnë për të shijuar jo vetëm ushqimin, por ajrin e pastër, qetësinë, natyrën e paprekur dhe peizazhet që të mbeten në kujtesë. Zona përreth është një thesar i vërtetë për ata që duan të ecin nëpër histori dhe natyrë. Shpella e Plakës, Ujvara, Mulliri i Blogut, Guri i Sukllit, Hani i Hoxhës, rruga antike Egnatia me gjurmë të ruajtura në gjendje të shkëlqyer – të gjitha këto janë vetëm disa nga atraksionet që ofron kjo zonë. Nga këtu mund të ecësh për në Qytezën e Xhyrës, në fushën e Rafjes, në Gurin e Bletës, në Ujësjellësin Otoman, në kalanë e vjetër, në urat e gurta dhe tunelet që i përkasin një kohe tjetër. Kjo është një thirrje për të gjithë ata që duan të bëjnë diçka për vendlindjen e tyre. Siç thotë edhe vetë Petriti – investimi në vendlindje është më shumë se biznes: është një mision. Është një mënyrë për të mos e braktisur tokën ku ke lindur, për t’i dhënë jetë dhe për ta çuar përpara duke ruajtur identitetin, traditën, kulturën. Nëse doni të përjetoni një eksperiencë që nuk harrohet – mes historisë, shijes dhe natyrës – ejani në “Shpellën e Plakës”. Jo thjesht për të parë… por për të ndjerë. Sepse këtu, çdo gjë flet shqip – toka, ajri, uji, buka dhe mikpritja.