MWAKILISHI WA MBUNGE WA JIMBO LA KIBAKWE AFUNGUA RASMI ZAHANATI YA CHAMTUMILE

Kibakwe, Aprili 4, 2026 – Mwakilishi Mbunge wa Jimbo la Kibakwe ambaye pia ni Mwenyekiti wa Halmashauri ya Wilaya ya Mpwapwa, Mhe. Richard Maponda, amefungua rasmi Zahanati ya Chamtumile iliyopo Kata ya Kibakwe, hatua inayoimarisha upatikanaji wa huduma za afya kwa wananchi wa kata hiyo na maeneo ya jirani. Akizungumza wakati wa hafla ya ufunguzi, Mhe. Maponda amewapongeza wananchi wa Kijiji cha Chamtumile kwa moyo wao wa kujitolea na ushirikiano uliowezesha kuanzishwa kwa zahanati hiyo tangu mwaka 2013, ameeleza kuwa ushiriki wa wananchi katika miradi ya maendeleo ni msingi muhimu wa kufanikisha utoaji wa huduma bora za kijamii na kuwasisitiza kutunza na kuienzi miundombinu yote ya zahanati hiyo,ili iweze kutumika vizazi hadi vizazi. Ujenzi wa Zahanati ya Chamtumile umegharimu takribani shilingi milioni 135, ambapo wananchi walichangia nguvu na rasilimali zenye thamani ya takribani shilingi milioni 10, Mfuko wa Jimbo ulichangia shilingi milioni 6, Serikali Kuu ilitoa shilingi milioni 75, pamoja na shilingi milioni 44 ya vifaa tiba. Nae,Mganga Mkuu wa Wilaya Dr Stanley Mlay ameelezea huduma zote zinazostahili kutolewa katika ngazi ya zahanati, ikiwemo huduma za wagonjwa wa nje, afya ya mama na mtoto, huduma za uzazi, chanjo, uchunguzi wa magonjwa mbalimbali, ushauri wa afya, pamoja na huduma nyingine za msingi. Kupatikana kwa huduma hizo kutapunguza umbali wa wananchi kufuata matibabu na kuboresha afya na ustawi wa jamii. Wananchi wa Kata ya Kibakwe wameeleza kufurahishwa na kukamilika kwa mradi huo, wakisema ni hatua muhimu katika kuboresha huduma za afya na kuharakisha maendeleo ya kijamii na kiuchumi katika eneo hilo.