Martial Arts of Myanmar "Thaing"

မြန်မာ့ရိုးရာသိုင်းပညာဆိုတာ အမျိုးသားရေးစိတ်ဓါတ်ကို ပြည့်ဝခိုင်မာ ရှင်သန်စေတဲ့ ပညာရပ်တစ်ခုဖြစ်ပါတယ်။ သိုင်းပညာကို ယုံကြည်ကိုးစားအားထားမှုနဲ့ သင်ကြားခြင်းပြုတဲ့အချိန်ကစပြီး ပညာစဉ် သမစဉ်ကို ရိုသေလေးစားရမယ်တာဝန်၊ ဘိုးဘွားပိုင် ရိုးရာပညာကို မပျောက်ပျက်အောင် ထိန်းသိမ်းစောင့်ရှောက်ရမယ့် တာဝန်၊ နိုင်ငံတော်လုံခြုံရေးနဲ့ ကာကွယ်ရေးကို စောင့်ရှောက်ရမယ့် တာဝန် စတဲ့ တာဝန် (၃)ရပ်ကို ထမ်းဆောင်ရမယ့်သူလို့ မိမိကိုယ်ကို ခိုင်မြဲစွာမှတ်ယူရပါတယ်။ မြန်မာ့သိုင်း ဆိုတာ ကိုယ်ခံပညာရပ်တစ်ခုပါ၊ အားကစားတစ်ခုပါလို့ ဆိုနေကြတာထက်ကို လေးနက်ပါတယ်။ ဘာလို့လဲဆိုရင် မြန်မာ့သိုင်းဆိုတာ အမျိုးသားရေးနဲ့ယှဉ်နေတဲ့ တကယ့် ဘိုးဘွားအစဉ်အဆက် ကိုယ်ပိုင် Martial Art၊ ကိုယ်ပိုင် သေနင်္ဂဗျူဟာလို့ ဆိုနိုင်တဲ့ စစ်ရေးအတတ်ပညာတစ်ခုမို့ပါ။ မြန်မာတွေစကတည်းက မြန်မာ့စာ၊ မြန်မာစကား၊ မြန်မာ့ အနုပညာ၊ မြန်မာ့ကိုယ်ပိုင်ယဉ်ကျေးမှု တွေရှိခဲ့သလို မြန်မာ့ကိုယ်ပိုင်မူနဲ့ မြန်မာ့သိုင်း ဆိုတဲ့ ကိုယ်ပိုင် ကိုယ်ခံပညာရပ်လည်း ရှိခဲ့တာပါ။ ဒီပညာက မြန်မာ့မူပိုင်အစစ်ပါ။ ဒီအတတ်ပညာတွေနဲ့ ကိုယ့်တိုင်းပြည်၊ ကိုယ့်လူမျိုး၊ ကိုယ့်ဘာသာသာသနာကို သမိုင်းစဉ်ဆက် ကာကွယ်ခဲ့တဲ့ ပညာတွေဖြစ်တဲ့အတွက် ဒီပညာတွေကို မြန်မာတိုင်းက လေးစားမြတ်နိုးတန်းဖိုးထားတတ်ရပါမယ်။ အမျိုးသားပညာရပ်တစ်ခုကို မပပျောက်အောင်ထိန်းသိမ်းဖို့က တစ်မျိုးသားလုံးမှာ တာဝန်ရှိပါတယ်။ ကမ္ဘာမှာ မြန်မာဆိုပြီး ဆက်လက်ရှင်သန် တည်ရှိနေစေဖို့အတွက် မိမိတို့ရဲ့ ဘိုးဘွားပိုင် မြန်မာ့ရိုးရာအမွေအနှစ်များကို ပပျောက်မသွားအောင် လက်ဆင့်ကမ်းထိန်းသိမ်းကြဖို့၊ တန်ဖိုးထားတတ်ကြဖို့၊ အားပေးကြဖို့ဆိုတာ ကျွန်တော်တို့ မြန်မာနိုင်ငံသူနိုင်ငံသား အားလုံးနဲ့ဆိုင်တဲ့ မျိုးချစ်စိတ်နဲ့လုပ်ရမယ့် အမျိုးသားရေးတာဝန်တစ်ခုပင် ဖြစ်ပါတယ်။