WRRB YAANZA KUTEKELEZA MAAGIZO YA WAZIRI MKUU

Bodi ya Usimamizi wa Mfumo wa Stakabadhi za Ghala (WRRB) imeanza kutekeleza maagizo ya Waziri Mkuu, Dkt. Mwigulu Nchemba, yaliyolenga kuimarisha usimamizi wa Mfumo wa Stakabadhi za Ghala na kutatua changamoto zinazojitokeza katika utekelezaji wa mfumo huo. Akizungumza baada ya kufanya ziara katika mikoa ya Pwani, Lindi, Mtwara, Ruvuma, Morogoro na Iringa, ikiwa ni sehemu ya utekelezaji wa maagizo yaliyotolewa wakati wa maadhimisho ya miaka 20 ya WRRB yaliyofanyika Mei 19, 2026, jijini Dodoma, Mkurugenzi Mtendaji, Bw. Asangye Bangu, amesema kuwa WRRB inaendelea kushirikiana kwa karibu na serikali za mikoa na wilaya ili kuhakikisha mfumo huo unaendelea kumlinda na kumuinua mkulima wa Tanzania. Bw. Bangu pia amesema WRRB inaendelea kuchukua hatua za kuboresha ubora wa mazao, kuongeza idadi ya maghala, kuhamasisha uzalishaji, pamoja na kutoa elimu kuhusu mwenendo wa bei za mazao katika soko la dunia. Ameeleza kuwa juhudi hizo zinalenga kuhakikisha wakulima wanapata manufaa makubwa zaidi kupitia Mfumo wa Stakabadhi za Ghala.