SERIKALI YAHIMIZA USIMAMIZI BORA WA GHALA KUINUA BIASHARA YA MAZAO

Watumishi na wasimamizi wa shughuli za ghala nchini wametakiwa kutekeleza majukumu yao kwa uadilifu, weledi na uwajibikaji ili kuimarisha Mfumo wa Stakabadhi za Ghala na kuongeza ufanisi katika biashara ya mazao ya kilimo. Wito huo umetolewa na Afisa Tawala wa Wilaya ya Morogoro, Bi. Janeth Chatta, kwa niaba ya Mkuu wa Wilaya ya Morogoro, alipokuwa akifunga mafunzo ya wasimamizi wa shughuli za ghala kwa msimu wa biashara wa mbaazi na dengu 2026/2027 yaliyofanyika wilayani humo. Bi. Chatta amesema uadilifu wa watendaji wa mfumo ni msingi wa kujenga imani kwa wakulima, wanunuzi na taasisi za fedha, huku akisisitiza kuwa Mfumo huo umeendelea kuwa nyenzo muhimu ya kuhakikisha biashara ya mazao inafanyika kwa uwazi, ubora na ushindani. Amesema Serikali ya Awamu ya Sita chini ya Mhe. Rais Dkt. Samia Suluhu Hassan inaendelea kuhimiza matumizi ya Mfumo huo pamoja na Soko la Bidhaa Tanzania (TMX) ili kuongeza thamani ya mazao, masoko yenye ushindani na manufaa kwa wakulima. Amewataka washiriki kutumia maarifa waliyopata kutekeleza majukumu yao kwa weledi, kuendana na mabadiliko ya teknolojia na kuhakikisha taarifa za mazao zinakuwa sahihi na kwa wakati. Pia ameipongeza Bodi ya Usimamizi wa Stakabadhi za Ghala (WRRB) kwa kuendelea kuimarisha uwezo wa watendaji kupitia mafunzo yanayochangia kuongeza ufanisi wa mfumo na kukuza biashara ya mazao nchini. Mafunzo hayo yamefanyika kwa siku tano kuanzia na yamehudhuriwa na washiriki 103 kutoka kampuni za uendeshaji ghala na wadau mbalimbali wa mfumo.