کۆشکی بلوورین-مامۆستا هەژار موکریانی-بە دەنگی خۆی

كۆشكی بلوورین ٤٠ساڵ پترە تۆمارێکی هەموو دیوانی "هەژار" ی گەورەم لایە، ماوەیەکیشە تۆمارەکە کراوەتە دیجیتاڵ. دەمەوێ جاروبار هەندێکی لێ بڵاو بکەمەوە و ئێوەی ئازیزیش بکەم بە خاوەنی. تۆماری لای من جێجێی پچڕاوی تێدایە و دەنگەکە هێندە پوختە نییە، جا ئەگەر کۆپییەکی لەمە خاوێنتر و تەواوتر لای کەسێکی دی هەبێ مژدەیەکی گەورەیە، هەر نەبێ بۆ من. "بەیتی سەرەمەڕ" یان "کۆشکی بلوورین" هۆنراوەیەکی درێژە، کە "هەژار" لە ناوەڕاستی حەفتاکاندا لە شاری (کەرەج)ی ئێران، وەک بەشێکی دیوانەکەی بە دەنگی خۆی تۆماری کردووە. هۆنراوەکە لە بنچینەدا هی شاعیرێکی تورکە، کە ناوی " سەباحەددین عەلی" یە و هەژار ساڵی ١٩٤٨ لە ڕۆژنامەیەکی عەرەبیدا، وەک خۆی دەڵێ، بینیویەتی و دوای چەند ساڵێک وای کوردییاندووە، هێندە وەستایانە تیفتیفەی داوە و سەوداسەرانە بە گەوهەر و چەک و خشڵی زمانی پەرجۆ خەمڵاندوویە، ئیتر نە وەرگێڕی عەرەب دەیناسێتەوە نە خاوەنە تورکەکەی! هیچ ڕۆژگارێک وەک ئەمەی ئێستا لەبار نییە بۆ بڵاوکردنەوەی "کۆشکی بلوورین". هەنووکە، نەک بە چاوی دڵ، بەڵکوو بە چاوی کز و پڕووشیش دەبینرێ چۆن نێزیکەی ٣٠ ساڵە چەند "تەمبەڵ"ێک، بە نەخشە و پیلانی ئێران و تۆران "کۆشکی بلوورین"مان بۆ ڕۆ دەنێن و خەونی نەتەوەیەکی گەورە زندەبەچاڵ دەکەن و لە نیشتمانی هەزاران ساڵەی خۆیدا دەیکەنە سواڵکەری بەر دەرگەی گەجەروگوجەری دنیا. خۆزگە، سەد خۆزگە، "هەژار" لە درزێکی مەزارەکەیەوە، تیچاوێکی لە "قولی بەگ"ەکانی ئەمڕۆی کوردستان دەبوو، کە ڕۆژگارێک قەڵای قایمی هیوای خۆی لەسەریان بنیات نابوو. بریا، سەد بریا، "شێمحیەددین" ە نەخوێندەوارە زگتێڕەکانی دەبینی چۆن کوردستانی "دڵبەر"یان وەپێش خۆ داوە و بەرەو ئاستەمترین و زەقترین هەڵدێری دەبەن. دەی، بەڵکوو پارچە بلوورێکی کەلاوەکانی ئەو کۆشکە نەفرینە بدرەوشێتەوە و ئەوبەری تونێلی ئەم قۆناخە تاریکەمان نیشان بدا؟ عەبدوڵڵا پەشێو ٢٠٢٠/٧/٦