Мұны айта-айта елдің ығыры шықты: Ақтау халқына қашан таза су беріледі?

Ақтауда таза суға зар болып отырған халықтың мәселесін өңірдің шенеуніктері әлі күнге шеше алмай отыр. Өйткені, қаладағы пәтерлердің құбырынан ішпек түгілі жуынуға да жарамайтын қап-қара, лай су ағып жатыр. Тұрғындар бірнеше жылдан бері осындай сапасыз су үшін ақы төлеп шаршадық дейді. Ол аздай, жаздай тіпті бір тамшы суға жарымадық деп ашулы. Ал күз келгенде ыстық судың рахатын көреміз бе деген жұрт, оның да лас екенін көріп ашынып отыр. Света Өтелгенова «таңертең құбырды ашқанда мұнайдай қара суға қарық болдым» деп мәселесін әзілмен жеткізді. Кесте бойынша кешігіп келетін ыстық судың түрі осы дейді. Айтуынша, жаз бойы тіршілік нәріне зар болғанымыз аздай, жуынуға да жарамайтын лай суға ақы төлейміз деп ашулы. Қазір амалы құрыған келіншек көшедегі автоматтардан су тасып жүр. Оның әр литріне 10 теңге төлеп, күніне 20 литрін тұтынады екен. СВЕТА ӨТЕЛГЕНОВА, Ақтау қаласының тұрғыны: Жазымен су то келеді, то келмейді. Жаңа мен кухнядан аштым, ашсам қап-қара қара су. Ыссы су жаңа келіп бастап жатыр. Туалетің бар, кухняң бар, посудаң бар, тамағың бар пісіретін. Оның бәріне қайта-қайта ана жақтан су тасып 5 литровый. Не дело. РЫСКҮЛ ТИКЕЕВА, Ақтау қаласының тұрғыны: – 21 ғасырда мынандай дұрыс жағдай жасалу керек қой. Барлық нәрсеге адамдар ақшасын төлеп жатыр. Суды сатып алып ішу дұрыс емес нәрсе деп ойлаймын қазіргі заманда. Ауыз судың әлегін айта-айта шаршаған халық енді кімнен көмек сұрарын білмей отыр. Әкімдіктегілер болса облыс бойынша тәулігіне 51 мың текше метр судың жетпейтінін растап отыр. Бұл мәселені шешу үшін 2025 жылға дейін 9 зауыт салу үшін 282 миллиард теңге қаражат бөлу жоспарда бар дейді. БЕРДІБЕК ҚАРТБАЕВ, Маңғыстау облыстық тұрғын үй коммуналдық шаруашылық басқармасының басшысы: – Барлық зауыттың қуаты 260 мың текше метрді құрайтын болады тәулігігіне. Бұл зауыттар уақытылы іске қосылатын болса жаңа аталған облыстық деңгейдегі ауыз суға деген қажеттілікті толықтай өтеп, мәселені шешетін боламыз. Бұдан бөлек, әкімдіктегілер Ақтау қаласының ауыз су, кәріз және жылу желілерінің тозығы жеткенін айтып отыр. Сол үшін алдағы екі жылда 918 шақырым инженерлік желіге жаңғырту жұмыстары жүргіземіз деп сендірді. Махаббат Нұржанқызы, Фархад Шадкам Бізді әлеуметтік желіде оқыңыздар: Youtube -   / @informburo31kanal   Facebook -   / informburo31   Instagram -   / informburo31   Vkontakte - https://vk.com/informburo31 TikTok - www.tiktok.com/@informburo31 WhatsApp Информбюро +7 777 331 31 31