Wataalamu wa Sekta Mbalimbali Wajengewa Uwezo Usimamizi wa Maliasili Kupitia FOLUR

Maafisa kutoka sekta mbalimbali zinazoshiriki katika usimamizi wa maliasili za Kongani ya Zanzibar wameendelea kujengewa uwezo kupitia mafunzo yanayoratibiwa na Mradi wa FOLUR. Mafunzo hayo yanalenga kuimarisha uelewa, ushirikiano na matumizi ya mbinu endelevu za kuhifadhi na kusimamia rasilimali za asili kwa manufaa ya kizazi cha sasa na kijacho. Katibu Mkuu wa Wizara ya Kilimo, Umwagiliaji, Maliasili na Mifugo Salehe Mohamed Juma amefungua rasmi mafunzo ya siku tano ya usimamizi wa maliasili za Kongani ya Zanzibar yanayotekelezwa kupitia Mradi wa FOLUR, yanayofanyika katika kumbi za Wizara ya Kilimo Zanzibar. Mafunzo hayo yanawakutanisha wataalamu kutoka sekta mbalimbali, wakiwemo wataalamu kutoka (IRA), pamoja na maafisa wa serikali na wadau wengine wa mazingira na maliasili. Lengo kuu ni kuimarisha uelewa na mbinu endelevu za uhifadhi, usimamizi na matumizi bora ya maliasili kwa maendeleo endelevu ya Zanzibar.