Mradi wa Kulinda Misitu na Mazingira ya Pwani Zanzibar Waanza Rasmi Utekelezaji

Mradi wa “Kulinda Misitu na Mazingira ya Pwani ya Zanzibar kwa Manufaa Endelevu” umeanza rasmi kutekelezwa baada ya kufanyika kwa Warsha ya Utambulisho na Kujenga Uelewa wa Pamoja kwa wadau mbalimbali Zanzibar. Akizungumza katika warsha hiyo, Katibu Mkuu wa Wizara ya Kilimo, Umwagiliaji, Maliasili na Mifugo, Ndugu Saleh Mohamed Juma, amesema maandalizi ya mradi huo yalifanyika kwa muda mrefu, hivyo warsha hiyo imekuwa muhimu katika kukumbushana malengo yake pamoja na kuimarisha uelewa wa pamoja. Ameongeza kuwa warsha hiyo pia imesaidia kufanya tathmini ya mazingira ya sasa ili kuhakikisha utekelezaji wa mradi unakwenda sambamba na hali halisi ya kijamii na kimazingira. Mradi huo utatekelezwa kwa kipindi cha miaka sita na unatarajiwa kuleta manufaa endelevu ya kiuchumi, kijamii na kimazingira kupitia uhifadhi wa misitu na maeneo ya pwani ya Zanzibar.