KAMATI YA MADINI NA NISHATI 'YATIA NENO' UJENZI BOMBA LA MAFUTA

Kamati ya Kudumu ya Bunge ya Nishati na Madini, imefanya ziara ya kutembelea mradi wa bomba la mafuta linalojengwa kutoka Hoima nchini Uganda hadi Chongoleani mkoani Tanga, na kuhimiza umuhimu kwa wawekezaji kurejesha sehemu ya faida kwa jamii. Akizungumza baada ya ziara ya kamati hiyo kwenye eneo la Chongoleani, Mwenyekiti wa kamati hiyo, Mhe. David Mathayo amesema wameridhishwa na maendeleo yaliyofikiwa kwenye mradi huo, na wana matumaini utakamilika kwa wakati. "Tumefurahishwa na maendeleo ya hatua yaliyofikiwa kwenye mradi huu, tumeona wako mbele zaidi katika utekelezaji unavyostahili kuwa," amesema Mathayo Mathayo amesema mradi huo ni muhimu kwa watanzania kwa kuwa utaleta manufaa makubwa ya kiuchumi kwa nchi na ukanda wa Afrika Mashariki. "Tunafahamu watu wanausema vibaya mradi huu, ila sisi wabunge tunasema mradi huu ni muhimu sana kwetu na uendelee, kwa kuwa hauna madhara yoyote na una manufaa makubwa kiuchumi," ameongeza. Naye Naibu Katibu Mkuu wa Wizara ya Nishati, Athumani Mkutuka amesema Serikali imepokea maelekezo na ushauri uliotolewa na kamati hiyo, na watahakikisha miradi yote mikubwa ya maendeleo inayotekelezwa katika maeneo mbalimbali inarudisha sehemu ya faida kwa jamii ili waweze kunufaika na uwepo wa miradi hiyo. Kuhusu mradi huo, kamati hiyo imependekeza watekelezaji wake waangalie kwa mapana zaidi namna ya kuendelea kuisaidia jamii inayowazunguka. Mwisho