WANANCHI 2,823 KUNUFAIKA NA MRADI WA MAJI BAMBA MWARONGO

Wananchi 2,823 wa vijiji vya Bamba Mwarongo na Mazola Kilifi, Wilaya ya Mkinga mkoani Tanga, wanatarajiwa kunufaika na huduma ya maji safi na salama kufuatia uzinduzi wa mradi wa upanuzi wa huduma ya maji uliofanywa na Mwenge wa Uhuru 2026. Mradi huo umeanzishwa kwa lengo la kuongeza upatikanaji wa huduma ya maji na kusogeza huduma hiyo karibu na wananchi, ikiwa ni sehemu ya juhudi za Serikali ya Awamu ya Sita chini ya uongozi wa Rais wa Jamhuri ya Muungano wa Tanzania, Mhe. Dkt. Samia Suluhu Hassan, za kuboresha huduma za maji na kumtua mama ndoo kichwani. Akiwasilisha taarifa ya mradi mbele ya Kiongozi wa Mbio za Mwenge wa Uhuru Kitaifa, Wazo Mwang’onda, Meneja wa RUWASA Wilaya ya Mkinga, Mhandisi Bakari Kiwitu, alisema mradi huo umehusisha ulazaji wa mabomba kwa umbali wa kilomita 14.214, ujenzi wa tanki la maji lenye uwezo wa kuhifadhi mita za ujazo 75 juu ya mnara wenye urefu wa mita 12 pamoja na ujenzi wa vituo saba vya kuchotea maji. Alisema mradi huo umegharimu shilingi 498,414,502 na unatarajiwa kuboresha maisha ya wananchi wa vijiji hivyo kwa kuwaondolea adha ya kutembea umbali mrefu kutafuta maji. Kwa upande wake, Mbunge wa Jimbo la Mkinga, Mhe. Twaha Mwakioja, alisema hali ya upatikanaji wa maji katika jimbo hilo inaendelea kuimarika kutokana na miradi mbalimbali inayotekelezwa na Serikali. Alisema kwa sasa kiwango cha upatikanaji wa huduma ya maji katika Jimbo la Mkinga kimefikia asilimia 72.6 na kinatarajiwa kuongezeka hadi asilimia 85 ifikapo Desemba 2026. Mhe. Mwakioja aliongeza kuwa kati ya vijiji 85 vilivyopo jimboni humo, vijiji 77 tayari vinapata huduma ya maji safi na salama, huku juhudi zikiendelea kuhakikisha vijiji vilivyosalia vinafikiwa na huduma hiyo muhimu. Akizungumza baada ya kuzindua mradi huo, Kiongozi wa Mbio za Mwenge wa Uhuru Kitaifa, Wazo Mwang’onda, amepongeza Serikali kwa kuendelea kuwekeza katika miradi ya maji inayoboresha maisha ya wananchi na kuimarisha huduma za kijamii. Wananchi wa Bamba Mwarongo na Mazola Kilifi wameeleza kufurahishwa na mradi huo wakisema umeondoa changamoto kubwa ya upatikanaji wa maji na utaongeza muda wa kushiriki shughuli za uzalishaji mali na maendeleo ya familia zao.