US Visa માટે ઈન્ટરવ્યુ આપવા ગયેલા દેસીનો ‘કચરો’ થઈ ગયો

અમેરિકાના વિઝા લેવા માટે પોપટની જેમ બધા સવાલોના જવાબ ગોખીને જતા અમુક લોકોનો ક્યારેક સાવ કચરો થઈ જતો હોય છે. આવો જ એક બનાવ તાજેતરમાં દિલ્હી એમ્બસીમાં બન્યો હતો જ્યાં એક દેસીએ પોતાને ફુટબોલ વર્લ્ડકપની ફાઈનલ જોવા માટે અમેરિકા જવું છે તેવી વાર્તા કહી હતી. જોકે, હોશિયાર વિઝા ઓફિસરે આ દેસીને એવો સવાલ કર્યો હતો કે તમે ગઈકાલની મેચ જોઈ હતી? આ અણધાર્યો સવાલ સાંભળતા જ આ દેસી ભોંઠો પડ્યો હતો.. કયા-કયા દેશોની મેચ હતી તેની જ કોઈ માહિતી ના હોવાથી હા પાડીને તે વધારે ફસાય તેમ હતો. આખરે પોતે ગઈકાલની મેચ નથી જોઈ તેવું જણાવીને તે નેક્સ્ટ ક્વેશ્ચનની રાહ જોઈ રહ્યો તો પણ વિઝા ઓફિસરે તેની ચોરી પકડી લીધી હતી.