Чолпон-Атада Бирдиктүү коопсуздук кызматынын гарнизондук бөлүштүрүүсү болуп өттү

Ысык-Көл облусунун Чолпон-Ата шаарында туристтик сезондо коомдук тартипти сактоо жана коопсуздукту камсыздоо ошондой эле мүмкүн болгон өзгөчө кырдаалдарга ыкчам чара көрүү үчүн тартылган Бирдиктүү коопсуздук кызматынын күчтөрүнүн жана каражаттарынын гарнизондук бөлүштүрүүсү өттү. Иш-чарага Кыргыз Республикасынын Министрлер Кабинетинин Төрагасы – Президенттин Администрациясынын Жетекчиси Адылбек Касымалиев, Ички иштер министри, милициянын генерал-полковниги Улан Ниязбеков, мамлекеттик органдардын жана кызматтардын жетекчилери жана өкүлдөрү катышты. Экологиялык коопсуздукту жана жаратылышты коргоону күчөтүү максатында, Кыргыз Республикасынын Министрлер Кабинетинин тескемеси менен 2025-жылдын мартында Бирдиктүү коопсуздук кызматы түзүлгөн. Ага Ички иштер министрлиги, Өзгөчө кырдаалдар министрлиги, Саламаттыкты сактоо министрлиги, Жаратылыш ресурстары, экология жана техникалык көзөмөл министрлиги, ошондой эле Транспорт жана коммуникациялар министрлиги кирген. Гарнизондук кароо учурунда Бирдиктүү коопсуздук кызматынын бөлүмдөрүнүн эс алуу жайларында, туристтик инфраструктура объектилеринде жана эл көп эс алган маршруттарда коомдук тартипти, жарандардын жана туристтердин коопсуздугун камсыз кылуу боюнча коюлган милдеттерди аткарууга даярдыгы текшерилди. Иш-чаранын катышуучуларына жарандардын жана өлкөнүн конокторунун коопсуздугун камсыз кылуу, ошондой эле тоолуу аймактарда, Ысык-Көлдүн акваториясында жана жаратылышты коргоочу аймактарда кызмат өтөө үчүн колдонулуучу атайын техниканын жаңы үлгүлөрү, кызматтык автотранспорт, мототехника, суудагы кайгуул каражаттары жана заманбап жабдуулар көрсөтүлдү. Туристтик-экологиялык милиция бөлүмдөрүнүн ишмердигине өзгөчө көңүл бурулду. Жетүүгө кыйын тоолуу райондордо, жаратылышты коргоо зоналарында жана туристтик маршруттарда кызмат өтөгөн атчан бөлүмдөр көрсөтүлдү. Алардын ишмердиги коомдук тартипти сактоого, укук бузуулардын алдын алууга, браконьерлик фактыларын, балыкты мыйзамсыз кармоону жана жапайы жаныбарларды сактоого, ошондой эле жаратылыш ресурстарын жана экосистемаларды коргоого багытталган. Иш-чаранын өзгөчөлүгү ушул сыяктуу гарнизондук тизилүүлөр бир эле учурда өлкөнүн бардык аймактарында өткөрүлдү. Алардын жүрүшү бирдей убакыт режиминде LED-экрандарда көрсөтүлүп, өлкө боюнча күчтөрдүн жана каражаттардын даярдыгын көрсөтүүгө мүмкүндүк берди. Ички иштер министри, милициянын генерал-полковниги Улан Ниязбеков туристтик сезон учурунда коомдук коопсуздукту камсыз кылуу, жарандардын укуктарын коргоо, тартип бузууларды алдын алуу жана эс алуучулар үчүн коопсуз шарттарды түзүү ички иштер органдарынын артыкчылыктуу милдеттеринин бири экендигин белгилеп өттү. ИИМдин Басма сөз кызматы