က​​​လေးဝကို ကုန်းလမ်းနဲ့​ ရေလမ်းကတက်လာတဲ့စစ်​တပ်ကို​ တော်လှန်​ရေးတပ်တွေ တိုက်ခိုက် | People's Spring

သု၀ဏ္ဏကွင်းမှာ ကမ္ဘာ့ဖလားနောက်ဆုံးပွဲတွေပြဖို့ စစ်တပ်ပိုင် Mytel စီစဉ်နေ ဇူလိုင်-၁၄၊ ၂၀၂၆။ People's Spring စစ်တပ်ပိုင် စီးပွါးရေးလုပ်ငန်းတစ်ခုဖြစ်တဲ့ Mytel က ရန်ကုန်မြို့ သု၀ဏ္ဏဘောလုံးကွင်းမှာ ကမ္ဘာ့ဖလားပြိုင်ပွဲနောက်ဆုံးပွဲစဉ်တွေဖြစ်တဲ့ ဆီမီးဖိုင်နယ်နဲ့ ဖိုင်နယ်ပွဲစဉ်တို့ကို ပြသဖို့စီစဉ်နေကြောင်း ဒေသခံပြည်သူတွေက ပြောပါတယ်။ Mytel ဟာ World Cup 26 Fan Festival Myanmar နာမည်နဲ့ ဇူလိုင် ၁၄၊ ၁၅ရက်တွေမှာ ဆီမီးဖိုင်နယ်ပွဲနဲ့ ဇူလိုင် ၁၉၊ ၂၀ရက်မှာ တတိယလုပွဲ၊ ဗိုလ်လုပွဲတို့ကို ပြသဖို့စီစဉ်နေတာ ဖြစ်ပြီး လက်မှတ်တစ်စောင်ကို နေရာအလိုက် ကျပ် ၅ သောင်းမှ ၁ သိန်းအထိ သတ်မှတ်ကာ ရောင်းချနေပါတယ်။ ဒါ့အပြင် အဆိုတော်၊ စားသောက်ဆိုင်တွေနဲ့ စည်ကားစွာ ကျင်းပဖို့ စီစဉ်ထားပေမယ့် ဇူလိုင် ၁၃ရက် မနေ့ကအထိ လက်မှတ်တွေ ထင်သလောက် ရောင်းချရခြင်း မရှိတဲ့အတွက် ‘တစ်စောင်ဝယ်၊ တစ်စောင်အလကား’နဲ့ ရောင်းနေရကြောင်း သု၀ဏ္ဏကွင်းနဲ့ နီးစပ်တဲ့ အသိုင်းအဝန်းကတဆင့် သိရပါတယ်။ သု၀ဏ္ဏကွင်းမှာ ကမ္ဘာ့ဖလား စုကြည့်ဖို့ ဆိုပြီးရှယ်ပြင်ဆင်နေပြီး ဘောလုံးကွင်းပတ်လမ်းမှာ LED ဘုတ်ကြီး ဆင်ကာ ပွဲကြည့်စင်ပေါ်ကနေ ကြည့်ရမှာလို့ သု၀ဏ္ဏကွင်းနဲ့ နီးစပ်သူတစ်ဦးက ဆိုပါတယ်။ ကမ္ဘာ့ဖလားရဲ့ ဆီမီးဖိုင်နယ်နဲ့ ဖိုင်နယ်ပွဲစဉ်တွေဟာ ည ၁ နာရီခွဲမှ စတင်မှာ ဖြစ်တဲ့အတွက် သာမန်ပြည်သူတွေအနေနဲ့ သွားရောက်ကြည့်ရှုနိုင်မှာ မဟုတ်သလို ညသန်းခေါင် အိမ်ပြန်နောက်ကျပါက စစ်တပ်ရဲ့ ပေါ်တာဆွဲခြင်းကို ခံရနိုင်ကြောင်း ရန်ကုန်မြို့နေ လူငယ်တစ်ဦးက ပြောပါတယ်။ လက်မှတ်အခမဲ့ရခဲ့ရင်​တောင် ​ဘောလုံးပွဲသွားကြည့်ရမယ့် အသွားအပြန်ကားခ ၊ အခန့်မသင့်ရင်​ပေါ်တာဆွဲ ခံရနိုင်တဲ့ အန္တရာယ်​တေ့​ကြောင့် သာမာန်ပြည်သူ​တွေအတွက်အဆင်မ​ပြေဘဲ စစ်အုပ်စုနဲ့ နီးစပ်သူ​​တွေအများစုပဲကြည့်မယ်လို့ထင်​ကြောင်း ​တောင်ဥက္ကလာပမြို့နယ်ကအမျိုးသားတစ်ဦးက​ ပြောပါတယ်။ ပြည်သူတွေအပေါ်မှာ ‌အကြမ်းဖက်သတ်ဖြတ်မှုတွေပြုလုပ်နေတဲ့ စစ်တပ်ရဲ့ စီးပွားရေးထောက်တိုင် Mytel ကို ပြည်တွင်းမှာ ကမ္ဘာ့ဖလား‌ ဘောလုံးပွဲစဉ်တွေ ပြသခွင့်ပေးလိုက်တဲ့ ကမ္ဘာ့ဘောလုံးအဖွဲ့ချုပ် (ဖီဖာ)ရဲ့ လုပ်ရပ်ကို ရှုတ်ချကြောင်း Justice For Myanmar (JFM) ကထုတ်ပြန်ထားပါတယ်။ Mytel က ကမ္ဘာ့ဖလားပွဲတွေ ထုတ်လွှင့်တဲ့ TV360 ရဲ့ ဖေ့စ်ဘွတ်ခ်စာမျက်နှာကိုလည်း ဖေ့စ်ဘွတ်ခ်က ဖယ်ရှားထားပါတယ်။ လက်ရှိမှာတော့ Mytel က ကမ္ဘာ့ဖလားပွဲစဉ်တွေကို TV 360 Application က ထုတ်လွှင့်ပေးနေပြီး CANAL+ ရုပ်သံလိုင်းက‌လည်း ပြသပေးနေတာပါ။ ===== က​​​လေးဝကို ကုန်းလမ်းနဲ့​ ရေလမ်းက တက်လာတဲ့ စစ်​တပ်ကို​ တော်လှန်​ရေးတပ်တွေ တိုက်ခိုက် ဇူလိုင်-၁၄၊ ၂၀၂၆။ People's Spring ချင်းတွင်း မြစ်ကြောင်းအတိုင်းတက်လာတဲ့ စစ်သင်္ဘောအုပ်စုနဲ့ ယာကြီး-မင်းကင်း-ကလေးဝလမ်းအတိုင်း တပြိုင်နက်တက်လာတဲ့ စစ်တပ်စစ်ကြောင်းတွေကို ပြည်သူ့ကာကွယ်ရေးပူးပေါင်းတပ်ဖွဲ့တွေက ပိတ်ဆို့တိုက်ခိုက်တာမှာ စစ်တပ်ဘက်က အရာရှိအချို့အပါအဝင်၂၀ ဝန်းကျင်သေဆုံးပြီး လက်နက်ခဲယမ်းတွေလည်း သိမ်းဆည်းနိုင်ခဲ့တယ်လို့ မင်းကင်းမြို့နယ်ပြည်သူ့ကာကွယ်ရေးအဖွဲ့-ပကဖက သတင်းထုတ်ပြန်ပါတယ်။ အိန္ဒိယနဲ့ နယ်စပ်ကုန်သွယ်ရေးလမ်းကြောင်းကို ရှင်းလင်းဖို့ဆိုပြီး ၂၀၂၆ ဇွန်လကတည်းက စစ်တပ်က ကုန်းလမ်းရော၊ ရေလမ်းကြောင်းကပါ အထက်ပိုင်းကို တက်လာတာဖြစ်ပါတယ်။ ချင်းတွင်းမြစ်ကြောင်းအတိုင်း တိုက်ခိုက်ရေးရေယာဉ် အပါအဝင် ဖလပ်မော်တော်ယာဉ်(၂၈)စီးနဲ့ တက်လာသလို ယာကြီး-မင်းကင်း-ကလေးဝလမ်းမှာလည်း အင်အားသုံးရာလောက်နဲ့ တက်လာတာလို့ မင်းကင်း-ပကဖက ဇူလိုင် ၁၃ရက်မှာ ထုတ်ပြန်ပါတယ်။ ဗျူဟာမှူးတစ်ဦး ကွပ်ကဲပြီး ခမရ (၅၅၄) ဒုတပ်ရင်းမှူး အောင်ကိုကို ဦးစီးတဲ့ စစ်တပ်နဲ့ ပြည်သူ့စစ်ပူးပေါင်းတပ်ဖွဲ့ အင်အားသုံးရာဝန်းကျင်ပါ စစ်ကြောင်းကို ယာကြီး-မင်းကင်း-ကလေးဝလမ်းမှာ ​တော်လှန်​ရေးတပ်​တွေက ၉ကြိမ် ကြားဖြတ်တိုက်ခိုက်ခဲ့တယ်လို့ ​ဖော်ပြပါတယ်။ ဒါ့အပြင် ဇူလိုင် ၇ရက်မှာ ကနီမြို့ကနေ တက်လာတဲ့ တိုက်ခိုက်ရေးရေယာဉ်အပါ ဖလပ်မော်တော်ယာဉ်(၂၈)စီးကို ပြည်သူ့ကာကွယ်ရေးပူးပေါင်းတပ်ဖွဲ့တွေက ၃ကြိမ် ကြားဖြတ်တိုက်ခိုက်ခဲ့တာလို့ အသိပေးထားပါတယ်။ အဲဒီတိုက်ပွဲတွေအတွင်း စစ်တပ်ဘက်က ဗိုလ်ကြီးတစ်ဦး၊ ဗိုလ်တစ်ဦးအပါအဝင် ၂၀ကျော် သေဆုံးပြီး ၁၅ဦးဒဏ်ရာအပြင်းအထန်ရသွားတယ်လို့ မင်းကင်း-ပကဖက ဖော်ပြပါတယ်။ ဒါ့အပြင် MA (3) တစ်လက်၊60mmဗုံးသီးသုံးလုံး ၊ 40mmဗုံးသီး လေးလုံး ၊ RPG7 တစ်လုံး ၊ အီနာဂါတစ်လုံးအပါအဝင် ခဲယမ်းနဲ့ စစ်အသုံးအဆောင်ပစ္စည်းတွေ သိမ်းဆည်းရရှိတယ်လို့ ဆိုပါတယ်။ တိုက်ပွဲတွေက သတင်းလုံခြုံမှုကို ဦးစားပေးပြီးစနစ်တကျတိုက်ခိုက်ခဲ့ပြီး တော်လှန်ရေးဘက်က အထိအခိုက်မရှိခဲ့ဘူးလို့ ဒေသခံစစ်ရေးသတင်းရင်းမြစ်တစ်ဦးက ပြောပါတယ်။ မင်းကင်းမြို့နယ်ပကဖရဲ့ထုတ်ပြန်ချက်မှာလည်း ထိခိုက်မှု မရှိဘူးလို့ ဖော်ပြထားပြီး ချင်းတွင်း မြစ်ကြောင်းအတွင်းတိုက်ခိုက်မှုမှာ စစ်တပ်ရဲ့ ဖလပ်မော်တော် သုံးစီးကို FPV ဒရုန်းနဲ့တိုက်ခိုက်နိုင်ခဲ့တဲ့ ရုပ်သံမှတ်တမ်း​တွေကို ​​​​ဖော်ပြထားပါတယ်။ ဒီစစ်ဆင်ရေးကို ကလေးခရိုင်အမှတ်(၇/၈/၉/၁၀/၁၁)တပ်ရင်း ၊ မင်းကင်းမြို့နယ် ပကဖ ၊ ကလေးခရိုင် ဒရုန်းတပ်ဖွဲ့ ၊ မင်းကင်းမြို့နယ်ထဲက ပူပေါင်းတပ်တွေက တိုက်ခိုက်ခဲ့တာဖြစ်ပါတယ်။ စစ်တပ်က​တော့ မုံရွာ-ယာကြီး-က​လေးဝလမ်း​ကြောင်းမှာ ​တော်လှန်​ရေးတပ်​တွေရဲ့စခန်းအချို့ကို ထိန်းချုပ်နိုင်ပြီး နယ်​မြေစိုးမိုးမှု ပိုရလာတယ်လို့ သတင်းထုတ်ပြန်ထားပါတယ်။ 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 #ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #မိုင်တဲလ် #သုဝဏ္ဏကွင်း #ကမ္ဘာ့ဖလား #စစ်တပ်ထောက်တိုင် #ဘွိုင်းကောက် #ကမ္ဘာ့ဖလား၂၀၂၆ #BoycottMytel #BoycottMytel #ThuwunnaStadium #WorldCup2026 #JusticeForMyanmar #RejectMilitaryCoup #Myanmar #BoycottMilitaryProducts #ကလေးဝ #မင်းကင်း #ချင်းတွင်းမြစ် #ပြည်သူ့ကာကွယ်ရေးတပ်ဖွဲ့ #ပကဖ #နွေဦးတော်လှန်ရေး #စစ်အာဏာရှင်ဆန့်ကျင်ရေး #Kalewa #Mingin #ChindwinRiver #PDF #MyanmarResistance #SpringRevolution #AntiJunta #Myanmar