မျက်နှာပန်းလှတဲ့ နော်ဝေးအသင်းရဲ့ အိမ်ပြန်ခရီး | People's Spring

မျက်နှာပန်းလှတဲ့ နော်ဝေးအသင်းရဲ့ အိမ်ပြန်ခရီး ဇူလိုင်လ- ၁၄ ၊၂၀၂၆ ။People’s Spring ကမ္ဘာ့ဖလား ဘောလုံးပြိုင်ပွဲကနေ ရှုံးနိမ့် ထွက်ခွာလာခဲ့ပေမယ့်လည်း နော်ဝေး လက်ရွေးစင် ဘောလုံးအသင်းရဲ့ အိမ်အပြန် ခရီးမှာ ပရိသတ်တွေက လှိုက်လှိုက်လှဲလှဲ ကြိုဆိုခဲ့ကြပါတယ်။ ဇူလိုင် ၁၃ ရက်နေ့က အော်စလိုမြို့တော်ဆီ ပြန်ရောက်လာတဲ့ ဘောလုံးအသင်းဟာ အမိုးဖွင့် ဘတ်စ်ကားနဲ့ မြို့ထဲမှာ လှည့်လည်ခဲ့ပြီး ပရိသတ် ၁ သိန်းကျော်က လမ်းတွေပေါ် ထွက်လာပြီး ကစားသမားတွေကို သူရဲကောင်းတွေလို နှုတ်ဆက်ခဲ့ကြပါတယ်။ ဘတ်စ်ကား ဖြတ်သန်းသွားတဲ့ လမ်းတလျှောက်မှာတော့ နော်ဝေးအသင်းရဲ့ အနီရောင် ဘောလုံးဂျာစီ ဝတ်ဆင်ထားတဲ့ ပရိသတ်တွေ ပြည့်နှက်နေတာကိုလည်း တွေ့ခဲ့ရပါတယ်။ အခုနှစ်မှာတော့ နော်ဝေးဟာ ကမ္ဘာ့ဖလား ဘောလုံးပြိုင်ပွဲ သမိုင်းကြောင်းတလျှောက် ပထမဆုံး အကြိမ်အဖြစ် ကွာတားဖိုင်နယ် အဆင့်ထိ တက်ရောက်နိုင်ခဲ့ပါတယ်။ ဒါ့အပြင် နာမည်ကြီး ဘရာဇီးလို အသင်းမျိုးကိုလည်း အနိုင်ရအောင် ကစားပြခဲ့ပါတယ်။ နော်ဝေးဟာ ကွာတားဖိုင်နယ် အဆင့်ရောက်မှသာ အင်္ဂလန်ကို အချိန်ပိုမှာ နှစ်ဂိုး-တစ်ဂိုးနဲ့ အရေးနိမ့်ပြီး သူတို့ရဲ့ ခမ်းနားတဲ့ ကမ္ဘာ့ဖလား ဖြတ်သန်းမှုကို အဆုံးသတ်ခဲ့ရတာ ဖြစ်ပါတယ်။ အကြိုဗိုလ်လုပွဲ မတက်နိုင်ခဲ့ပေမယ့်လည်း ပရိသတ်တွေကတော့ အသင်းရဲ့ အားထုတ်မှုရဲ့ ရလဒ်တွေကို ကျေနပ်မဆုံး ဖြစ်နေပြီး အိမ်ပြန်လာတဲ့ ကစားသမားတွေကို သူရဲကောင်းတွေလိုမျိုး ကြိုဆိုခဲ့ကြတာပါ။ နော်ဝေးအသင်းကို တင်ဆောင်လာတဲ့ အောင်ပွဲခံ ဘတ်စ်ကားဟာ လေဆိပ်ကနေ ဖြည်းဖြည်းချင်း မောင်းနှင်လာပြီး နန်းတော်ဆီကို ရောက်လာခဲ့ပါတယ်။ အဲဒီနောက် ကစားသမားတွေက ပရိသတ်တွေကို နှုတ်ဆက်ခဲ့ကြပြီး ဘုရင်ဟာရဲလ်က သူတို့ကို ဂုဏ်ပြု ဧည့်ခံခဲ့ပါတယ်။ ထူးခြားမှု တစ်ခုက နော်ဝေးရဲ့ ကမ္ဘာ့ဖလား ဂိုးသွင်းအများဆုံး တိုက်စစ်မှူး အာလင်ဟာလန်းဟာ စောစောအိမ်ပြန်သွားလို့ အောင်ပွဲခံ အစီအစဉ်ရဲ့ နောက်ဆုံးပိုင်းတွေမှာ မပါဝင်ခဲ့ပါဘူး။ ဒါကြောင့် သူဟာ ကမ္ဘာ့ဖလားမှာ ရေပန်းစားလာတဲ့ နော်ဝေးအသင်းရဲ့ ဗိုက်ကင်းလှေလှော် အောင်ပွဲခံမှုမှာ ရှိမနေခဲ့ပါဘူး။ အဲဒီလို စုပေါင်း အောင်ပွဲခံရမှာတော့ နော်ဝေး အိမ်ရှေ့မင်းသား ဟာကွန်က ဗုံတီးပြီး ဦးဆောင်ခဲ့ပါတယ်။ အမေရိကန်ကနေ လေယာဉ် ထွက်ခွာလာချိန်က ၄ နာရီလောက် နောက်ကျခဲ့ကြောင်း၊ ဟာလန်းနဲ့ ကွင်းလယ်လူ ဆန်ဒါဘာ့ဂ်တို့ဟာ အော့စလိုကနေ ခရီးဆက်ဖို့ ကြိုစီစဉ်ထားပြီး လေယာဉ်မီအောင် အချိန်စော ထွက်ခွာသွားရတာဖြစ်ကြောင်း အသင်းမန်နေဂျာ စတေးလ် ဆိုလ်ဘက်ကန်က ရှင်းပြခဲ့ပါတယ်။ ရယ်စရာ အခြေအနေ တစ်ခုကတော့ နော်ဝေးအသင်းရဲ့ အောင်ပွဲခံ ဘတ်စ်ကားဟာ တစ်နေရာမှာ ခပ်နိမ့်နိမ့် သွယ်တန်းထားတဲ့ ဓာတ်ကြိုးတွေနဲ့ မလွတ်တာကြောင့် အလံတွေ ဝှေ့ယမ်းရင်း မတ်တပ်ရပ်နေတဲ့ ကစားသမားတွေ အားလုံး ထိုင်ခဲ့ကြရပြီး ကားကိုလည်း ခဏရပ်ထားခဲ့ရတာ ဖြစ်ပါတယ်။ နောက်တော့မှ အတားအဆီးတွေကို သေချာရှင်းလင်းပြီး ဘတ်စ်ကားကို ဆက်ထွက်နိုင်ခဲ့ပါတယ်။ ===== ကလေးတွေ လူမှုကွန်ရက် သုံးစွဲခွင့်ကို တစ်ဆင့်ချင်းစီ ကန့်သတ်သွားဖို့ EU ရည်ရွယ်ထား ကလေးငယ်တွေကို လူမှုကွန်ရက် မီဒီယာတွေနဲ့ ထိတွေ့ခွင့်ကနေ တစ်ဆင့်ချင်းစီ ကန့်သတ် ပိတ်ပင်သွားဖို့ ဥရောပ သမဂ္ဂ (EU)က စီစဉ်နေပါတယ်။ EUရဲ့ အုပ်ချုပ်ရေး အစုအဖွဲ့ဖြစ်တဲ့ ဥရောပ ကော်မရှင် (EC) အကြီးအကဲ အာဆူလာ ဗွန်ဒါ လီယန်က EU အဖွဲ့ဝင် နိုင်ငံတွေမှာ ကလေးတွေရဲ့ လူမှုကွန်ရက် အသုံးပြုမှုကို တဖြည်းဖြည်းချင်း အဆင့်လိုက် လျှော့ချဖို့ အစီအစဉ်တွေ ရေးဆွဲနေကြောင်း ဇူလိုင် ၁၃ ရက်နေ့မှာ ပြောကြားခဲ့ပါတယ်။ တစ်ဖက်မှာတော့ ပညာရှင်တွေက အသက် ၁၃ နှစ်အောက် ကလေးတွေရဲ့ အွန်လိုင်း ပလက်ဖောင်းတွေနဲ့ ထိတွေ့မှုကို မိဘ အုပ်ထိန်းသူတွေရဲ့ အပြည့်အဝ ထိန်းချုပ်ခွင့်အောက်မှာ ထားရှိစေသင့်ကြောင်း အကြံပြု တိုက်တွန်းထားပါတယ်။ EU အဖွဲ့ဝင် နိုင်ငံတွေဖြစ်တဲ့ ပြင်သစ်နဲ့ ဂရိတို့မှာ လူငယ်တွေရဲ့ လူမှုကွန်ရက် သုံးစွဲခွင့်ကို စတင်ကန့်သတ်လာသလို EU အဖွဲ့ဝင် မဟုတ်တဲ့ ဩစတြေးလျလို နိုင်ငံမျိုးမှာ ကလေးတွေ လုံးဝ လူမှုကွန်ရက် မသုံးရဘူး ဆိုတာမျိုး ဥပဒေပြု ပိတ်ပင်လာတဲ့နောက် EUလည်း အခုကိစ္စအပေါ် အာရုံစိုက်ဖို့ တောင်းဆိုမှုတွေ ရှိလာပါတယ်။ အစောပိုင်းမှာ EUဟာ ကလေးတွေကို လူမှုကွန်ရက် သုံးစွဲခွင့် ပိတ်ပင်ရေး ကိစ္စနဲ့ ပတ်သက်ပြီး တိကျတဲ့ သဘောထားမျိုး မပြသဘဲ ရှောင်လွှဲနေခဲ့ပါတယ်။ ဒါပေမဲ့ ဇူလိုင် ၁၃ ရက်နေ့မှာတော့ ဗွန်ဒါ လီယန်က EU အဖွဲ့ဝင် နိုင်ငံတွေကြားမှာ ကလေးတွေ လူမှုကွန်ရက်တွေကို ချိတ်ဆက်နိုင်မယ့် အသက်အရွယ်ကို တိတိကျကျ သတ်မှတ်ဖို့ လိုတယ်ဆိုတာ ဘုံသဘောတူညီမှုတစ်ခု ရရှိထားကြောင်း ထုတ်ပြောလာပါတယ်။ သူက အဲဒီကိစ္စကို အသက်အရွယ်နဲ့ သင့်တော်တဲ့ ကန့်သတ်မှုလို့ သုံးနှုန်းခဲ့ပါတယ်။ EUအနေနဲ့ မှန်ကန် ထိရောက်တဲ့ ဆုံးဖြတ်ချက်မျိုး ချမှတ်နိုင်ဖို့အတွက် ကျွမ်းကျင်သူတွေ၊ ဆရာဝန်တွေနဲ့လည်း သေချာ ဆွေးနွေး တိုင်ပင်နေတယ်လို့ သူက ဆိုပါတယ်။ ကလေးတွေက လူမှုကွန်ရက် မီဒီယာတွေနဲ့ ထိတွေ့ခွင့် ရနိုင်မလား ဆိုတာမျိုးထက် အဖွဲ့ဝင် နိုင်ငံတွေရဲ့ ကလေးတွေဆီကို လူမှုကွန်ရက်တွေက ဘယ်အချိန်ကျမှ ဘယ်လို ထိတွေ့ ချိတ်ဆက်ခွင့် ရှိလာစေမလဲ ဆိုတာကို EUဖက်က အလေးပေး စဉ်းစားနေကြောင်း ဗွန်ဒါ လီယန်က ပြောပါတယ်။ ကိုးကား: AFP 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 #ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #နော်ဝေးအသင်း #ကမ္ဘာ့ဖလား #ဘောလုံး #အာလင်ဟာလန်း #ကမ္ဘာ့ဖလား၂၀၂၆ #အိမ်အပြန်ခရီး #ဗိုက်ကင်းလှေလှော် #NorwayNationalTeam #WorldCup2026 #Football #ErlingHaaland #NorwayFans #WelcomeHome #WorldCupQuarterFinals #VikingClap #အီးယူ #ဥရောပသမဂ္ဂ #လူမှုကွန်ရက် #ကလေးသူငယ်ကာကွယ်ရေး #အွန်လိုင်းလုံခြုံရေး #အင်တာနက်ကန့်သတ်ချက် #EU #EuropeanUnion #SocialMedia #ChildSafety #OnlineSafety #SocialMediaBan #EuropeanCommission #UrsulaVonDerLeyen