Xhamia Çeshma e Kadis ( Hatmeja e pestë )

HATME NË XHAMINË ÇESHMA E KADISË - Reçicë e Vogël Sot e diel, më datë 28.12.2025, në Xhaminë Çeshma e Kadisë në Reçicë të Vogël, u organizua manifestim solemn me rastin e përfundimit të leximit të plotë të Kur’anit Fisnik – hatme, nga nxënësit e mektebit të kësaj xhamie, nën udhëheqjen e mualimit, Irfan ef. Emurllai. Në këtë manifestim, krahas prindërve, familjarëve dhe dashamirëve të fjalës së Zotit, i pranishëm ishte Myftiu i Myftinisë së Tetovës, Dr. Hfz. Selver ef. Xhemaili i shoqëruar nga stafi i tij, profesorë dhe hoxhallarë të rrethit. Në fjalimin e tij, Myftiu përgëzoi nxënësit për arritjen dhe përkushtimin e treguar në rrugën e dijes islame, si dhe uroi nxënësit, mualimin dhe prindërit. Pas programit të përgatitur me përkushtim, ish-myftiu i Tetovës, hfz. Imer ef. Kamberi e bëri duanë e hatmes, duke i lutur Allahut për pranimin e përpjekjeve dhe dijes së fituar nga nxënësit. Në vazhdim, u bë shpërndarja e diplomave për nxënësit që përfunduan hatmen, si dhe u shpërnda një mirënjohje dhe falënderimi për mualimin Irfan ef. Emurllai për angazhimin e tij të sinqertë dhe të palodhur. Programin e moderoi referenti i Myftinisë, Abdurahim ef. Murati, ndërsa për namaz të drekës imam ishte referenti, Idris ef. Idrizi. Zoti i bekoftë këta të rinj me dituri të dobishme dhe vepra të mira dhe mualimin e shpërbleftë me të mirat e Tij në dynja e në ahiret. Një falënderim i veçantë i shkon edhe hoxhallarëve, këshillit të xhamisë dhe të gjithë kontribuuesve që ndihmuan në realizimin e këtij manifestimi të mrekullueshëm.