PDF၊ ပကဖ တွေနဲ့အတူ စစ်ကိုင်းတိုင်းမှာ AA တိုက်ပွဲဝင် | People's Spring

PDF၊ ပကဖ တွေနဲ့အတူ စစ်ကိုင်းတိုင်းမှာ AA တိုက်ပွဲဝင် နေ့သစ်/People's Spring အမှတ်(၁) စစ်ဒေသက ဖေဖော်ဝါရီ ၁၁ ရက်နေ့က စစ်ရေးသတင်းထုတ်ပြန်ချက်က နွေဦးတော်လှန်ရေးမှာ စစ်ရေးသတင်းတွေကို စိတ်ဝင်စားသူတွေရဲ့ အာရုံကို ဖမ်းစားခဲ့ပါတယ် ။ အမှတ်(၁) စစ်ဒေသက စစ်ဆင်ရေးသတင်းတွေ မကြာခဏထုတ်ပြန်ခဲ့ပေမယ့် အခုထုတ်ပြန်ချက်အပေါ် ဘာကြောင့်ပိုစိတ်ဝင်စားခဲ့တာပါလဲ ။ စစ်ကိုင်းတိုင်း ၊ကန့်ဘလူခရိုင်အတွင်း တိုက်ပွဲတွေမှာ အမျိုးသားညီညွတ်ရေးအစိုးရရဲ့ လက်နက်ကိုင်တပ်ဖွဲ့တွေဖြစ်တဲ့ PDF တပ်ရင်းတွေ ၊ပကဖတွေနဲ့အတူ အင်အားကြီးတိုင်းရင်းသားလက်နက်ကိုင်တပ်ဖွဲ့ဖြစ်တဲ့ အာရက္ခတပ်တော်(AA) က စစ်တပ်စခန်းတွေ ၊စစ်ကြောင်းတွေကို ထိုးစစ်ဆင် တိုက်ခိုက်သိမ်းပိုက်နေတယ်လို့ တရာဝင်ထုတ်ပြန်လိုက်တာကြောင့်ဖြစ်ပါတယ်။ အရင်က လည်း ကချင်ပြည်နယ် ၊ကချင်နဲ့ စစ်ကိုင်းအစပ်တိုက်ပွဲတွေမှာ AA တပ်ဖွဲ့ဝင်တွေ က တော်လှန်ရေးတပ်တွေနဲ့အတူ တိုက်ပွဲဝင်ခဲ့တဲ့ဖြစ်စဉ်အချို့ရှိပေမယ့် သတင်းထုတ်ပြန်တာတွေမရှိခဲ့ပါဘူး ။အခုလို အတူ တိုက်ပွဲဝင်နေကြောင်း တရားဝင်ထုတ်ပြန်မှုဟာ အလွန်ရှားပါးသလို ပြည်သူတွေကိုရော ၊အာဏာသိမ်းစစ်အုပ်စုဘက်ကိုပါ အံအားသင့်စရာဖြစ်ခဲ့ပါတယ် ။ အထူးသဖြင့် တရုတ်အစိုးရ က တိုးတိုးဖြစ်စေ ၊ကျယ်ကျယ်ဖြစ်စေ NUG လက်အောက်ခံ PDF တွေကို မကူညီရဘူးလို့ မြောက်ပိုင်းမဟာမိတ်ညီနောင်သုံးဖော်(3 brotherhood) ထဲက MNDAA နဲ့ TNLA တို့ကို ဖိအားပေးတာ ၊အကြပ်ကိုင်ခဲ့တာတွေမကြာခဏလုပ်ခဲ့ပါတယ် ။အဲဒီလိုအခြေအနေမှာ ညီနောင်သုံးဖော်ထဲက AA တပ်ဖွဲ့ဝင်တွေဟာ NUG လက်အောက်ခံ တပ်တွေနဲ့ အတူ စစ်တပ်စခန်းတွေ ၊စစ်ကြောင်းတွေကိုတိုက်ခိုက်ချေမှုန်း နေတယ်လို့ တရားဝင်ထုတ်ပြန်မှုဟာ နွေဦးတော်လှန်ရေးမှာ ထူးခြားတဲ့ စစ်ရေးအရွေ့တစ်ခုလည်းဖြစ်နေပါတယ်။ဒါအပြင် အဲဒီတိုက်ပွဲတွေမှာ စစ်တပ်က အတော်လေးအထိနာခဲ့လို့ စစ်အုပ်စုအတွက် ရမ်းပုံမီးကျ အမျက်ထွက်စရာ၊ စိုးရိမ်စရာ ဖြစ်စေခဲ့မယ်လို့ သုံးသပ်ရပါတယ်။ ဒါကြောင့် အခုတပါတ်မှာPeople's Spring က ကန့်ဘလူခရိုင်အတွင်းက PDF ၊ ပကဖ ၊အာရက္ခတပ်တော်တို့ ရဲ့စစ်ဆင်ရေးအကြောင်းပြောပြပါမယ်။ ကန့်ဘလူခရိုင်အတွင်း၂၀၂၅ ခုနှစ် ဒီဇင်ဘာလကနေ ၂၀၂၆ ဖေဖော်ဝါရီလဆန်းအတွင်း PDF၊ ပကဖနဲ့ အာရက္ခတပ်တော်(AA)တို့ ပူးပေါင်းပြီး စစ်တပ် စခန်းလေးခုနဲ့ စစ်ကြောင်းတစ်ကြောင်းကို တိုက်ခိုက်ချေမှုန်းခဲ့တယ်လို့ NUG အမှတ်-၁ ဒေသက ဖေဖော်ဝါရီ ၁၁ရက်မှာ ထုတ်ပြန်တာပါ။ PDF၊ ပကဖနဲ့ အာရက္ခတပ်တော်(AA) ပူးပေါင်းတပ်တွေဟာ ကန့်ဘလူမြို့နယ်က ကိုးတောင်ဘို့ရွာစခန်း၊ ရွှေဘို-မြစ်ကြီးနားလမ်းပေါ်က ပေကြီးရွာစခန်း၊ ငှက်ပျောတိုင်းစခန်း၊ ကျွန်းလှမြို့နယ်က အင်တိုင်းရွာစခန်း နဲ့ ကောလင်းမြို့ကနေ ထွက်လာတဲ့ စစ်တပ်စစ်ကြောင်းတို့ကို တိုက်ခိုက်ခဲ့တာလို့ ဖော်ပြပါတယ်။ ကိုးတောင်ဘို့၊ ပေကြီး၊ ငှက်ပျောတိုင်းနဲ့ အင်တိုင်းစခန်းတွေဟာ ပျူစောထီးရွာ စခန်းတွေဖြစ်ပါတယ်။ အဲဒီတိုက်ပွဲတွေအတွင်း စစ်ကောင်စီတပ်ဖွဲ့ဝင် ၉၆ ဦး သေဆုံးပြီး ၃၈ဦး ဒဏ်ရာရသလို ၁၀၁ဦး ဖမ်းမိခဲ့တယ်လို့ ဖော်ပြထားပါတယ်။ လက်နက်မျိုးစုံ(၁၈၇)လက်၊ ကျည်မျိုးစုံ (၂၄,၆၅၂)တောင့်၊ ဗုံးသီးမျိုးစုံ (၅၃၀)အပြင် စစ်သုံးပစ္စည်းတွေလည်း သိမ်းဆည်းခဲ့တယ်လို့ သတင်းဓါတ်ပုံတွေနဲ့တကွထုတ်ပြန်ထားပါတယ်။ အဲဒီစစ်ဆင်ရေးတွေမှာ AAနဲ့အတူ ကန့်ဘလူမြို့နယ် ပြည်သူ့ကာကွယ်ရေးတပ်မတော်(PDF)၊အထူးလှုပ်ရှားတပ်မ၊ ကန့်ဘလူခရိုင် ဒရုန်းအဖွဲ့၊ ကန့်ဘလူခရိုင် ကျေးရွာ ပြည်သူ့ကာကွယ်ရေးတပ်ဖွဲ့(ပကဖ)၊ ကန့်ဘလူမြို့နယ်နဲ့ ခင်ဦးမြို့နယ် ပြည်သူ့ကာကွယ်ရေးအဖွဲ့ (ပကဖ)၊ စစ်ကိုင်းတိုင်း ပြည်သူ့ကာကွယ်ရေးတပ်ဖွဲ့(ပကဖ)၊ ကျွန်းလှမြို့နယ်၊တန့်ဆည်မြို့နယ် ပကဖ၊ ကန့်ဘလူခရိုင်အမှတ်(၁)စစ်ဒေသဒရုန်းတပ်ဖွဲ့၊ခရိုင်လက်နက်ကြီးတပ်ဖွဲ့တွေ ပူးပေါင်းတိုက်ခိုက်ခဲ့ကြတာပါ။ တိုက်ပွဲတွေအတွင်း အာဏာသိမ်းစစ်တပ်က Jet Fighter၊ Y-12 တို့နဲ့ (၃၇) ကြိမ် ဗုံးကြဲခဲ့သလို Gyrocopterနဲ့(၄) ကြိမ်၊ ကာမီကာဇေ ဒရုန်းနဲ့(၄)ကြိမ် တိုက်ခိုက်ခဲ့တာလို့ အသိပေးပါတယ်။ ပေကြီးရွာစခန်းနဲ့ ငှက်ပျောတိုင်းရွာစခန်းကို တိုက်ခိုက်သိမ်းပိုက်ပြီးနောက် ပြန်လည်ဆုတ်ခွာခဲ့ပြီး အင်တိုင်းရွာစခန်းနဲ့ ကိုးတောင်ဘို့ရွာစခန်းကို ဆက်လက် ထိန်းသိမ်းထားတယ်လို့ အမျိုးသားညီညွတ်ရေးအစိုးရ NUG ကာကွယ်ရေးဝန်ကြီးဌာနရဲ့ အမှတ်(၁) စစ်ဒေသက ထုတ်ပြန်ထားပါတယ်။ စစ်ရေးအရ အချက်အချာကျတဲ့ ကိုးတောင်ဘို့စစ်စခန်းကိုတော်လှန်ရေးတပ်တွေကအရင်ကအကြိမ်ကြိမ်တိုက်ခိုက်ခဲ့ဖူးပေမယ့် မသိမ်းပိုက်နိုင်ခဲ့ပဲ ၂၀၂၆ဇန်နဝါရီ ၃၁ ရက်မှာမှ အပြီသတ် သိမ်းယူခဲ့နိုင်ခဲ့တာပါ။ စစ်ရေးအရအရေးပါတာမို့ စစ်တပ်ကလည်း စစ်ကြောင်းတွေပြန်ထိုးပြီး ပြန်ထိန်းချုပ်နိုင်ဖို့ကြိုးစားနေတာကြောင့်တိုက်ပွဲတွေ ဆက်တိုက်ဆိုသလိုဖြစ်နေတာပါ ။ စစ်တပ်က ဗိုလ်ကြီး နောင်သူရ ဦးစီးပြီးတော့အမှတ်(၃၀၅) ခြေလျင်တပ်ရင်း (ခလရ-၃၀၅) နဲ့ စစ်တပ်လက်အောက်ခံ ပျူစောထီး ပူးပေါင်းအင်အား ၁၀၀ ခန့် ထိုင်ထားတဲ့ကိုးတောင်ဘို့ရွာစခန်းကို AA နဲ့ NUG လက်အောက်ခံ ပူးပေါင်းတပ်တွေက ဇန်နဝါရီ ၂၈ ရက်ကစတင်ထိုးစစ်ဆင်ခဲ့ပြီး ၃၁ ရက်မှာ သိမ်းပိုက်ခဲ့တာပါ ။ စခန်းသိမ်းတိုက်ပွဲမှာ ကန့်ဘလူမြို့နယ် ပြည်သူ့ကာကွယ်ရေးတပ်မတော် (PDF)၊ တန့်ဆည် PDF၊ စစ်ကိုင်းတိုင်း ပြည့်သူ့ကာကွယ်ရေးတပ်ဖွဲ့ (ပကဖ) စုစည်းစစ်ကြောင်း နဲ့ AA တို့ကပူးပေါင်းထိုးစစ်ဆင်သိမ်းပိုက်ခဲ့တာပါ ။ AA နဲ့အတူလက်တွဲတိုက်ပွဲဝင်နေတဲ့ တန့်ဆည်မြို့နယ်က PDF တဦးကလည်း"၂၀၂၅ထဲမှာ EROs တွေနဲ့ပိုပြီး စုစည်းနိုင်ပါပြီ။စစ်ကောင်စီကို ဖြိုဖို့ အဖြေကို သေချာ ရှာနေကြတာက အဆင့်တစ်ခုကို ရောက်နေပါပြီ။ AAတို့ KIA တို့လို့ စစ်ရေးကျွမ်းကျင်သူတွေနဲ့ အလုပ်တွဲလုပ်ရတာ ကျနော်တို့လည်း တိုက်ရ၊ ခိုက်ရတာ ပိုပြီး အားရလာတယ်။မျှော်လင့်ချက် အားကောင်းလာတယ်။ ပိုပြီး စုစည်းနိုင်လေ အောင်မြင်လေဖြစ်မှာကို ကျတော်တို့ ကောင်းကောင်းသိနေပြီ"လို့ဆိုလိုက်ပါတယ် ။ ။ 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 #ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA