စစ်တပ်ရဲ့ရက် ၁၀၀ ထိုးစစ် ဘယ်အခြေဆိုက်မလဲ | People's Spring

စစ်တပ်ရဲ့ရက် ၁၀၀ ထိုးစစ် ဘယ်အခြေဆိုက်မလဲ နေ့သစ်/People's Spring အာဏာသိမ်းစစ်တပ်က ဒီလပိုင်းမှာနိုင်ငံတစ်ဝန်းဆုံးရှုံးထားတဲ့ ဒေသတွေကို စစ်ကြောင်းတွေအများကြီးနဲ့ အရှိန်မြှင့်ပြီးတန်ပြန်ထိုးစစ်ဆင်လာပါတယ်။ မြောက်ပိုင်းမဟာမိတ်ညီနောင်သုံးဖော်နဲ့ မဟာမိတ်တော်လှန်ရေးတပ်တွေရဲ့ ၁၀၂၇ စစ်ဆင်ရေးအပြီး စစ်ရှုံးခဲ့တဲ့ စစ်တပ်က နိုင်ငံတစ်ဝန်းကို အင်အားအများဆုံးသုံးပြီး ဆုံးရှုံးဒေသတွေပြန်ထိန်းချုပ်နိုင်ဖို့ ကြိုးစားလာတာပါ ။ စစ်အုပ်စုဘက်ကတော့ အာဏာသိမ်းခေါင်းဆောင်မင်းအောင်လှိုင်ပြောထားတဲ့ ရက် ၁၀၀ အတွင်းဆုံးရှုံးနယ်မြေတွေ ပြန်ရဖို့ ထိုးစစ်လို့ ဝါဒဖြန့်နေကြပါတယ် ။ ဇူလိုင်လကုန်မှာအဆုံးသတ်မယ့် ရက်ပေါင်း ၁၀၀ အတွင်း တော်လှန်ရေးတပ်တွေကို လက်နက်မချရင် ၊စစ်တပ်နဲ့ မပူးပေါင်းရင် ပိုပြင်းပြင်းထန်ထန်တုံ့ပြန်မယ်လို့ကျယ်ကျယ်ပြန့်ပြန့်ဝါဒဖြန့်နေတာကိုတွေ့ရပါတယ်။ နိူင်ငံအတွင်းက လူငယ်တွေကို စစ်မှုမထမ်းမနေရဥပဒေနဲ့ အတင်းအကြပ်စုဆောင်းခဲ့တဲ့ စစ်မှုထမ်းဥပဒေ ၊ ၁၀၂၇ စစ်ဆင်ရေးမှာစစ်ရှုံးခဲ့ရာကနေတရုတ် ရုရှား အကူအညီတွေနဲ့ နလန်ထူလာတဲ့ စစ်တပ်က အခုလိုတန်ပြန်ထိုးစစ်တွေလုပ်လာနိုင်တာဖြစ်ပါတယ် ။ တန်ပြန်ထိုးစစ်ဆင်လာရင်း ဒီလပိုင်းမှာ ချင်းပြည်နယ် နဲ့ စစ်ကိုင်းက ဖလမ်း ၊အင်းတော် ၊မော်လူးမြို့တွေကို စစ်တပ်ကပြန်လည်ထိန်းချုပ်နိုင်ခဲ့ပါတယ် ။ အာဏာသိမ်းစစ်တပ်က နိုင်ငံတစ်ဝန်းစစ်ကြောင်းတွေဘယ်လိုထိုးနေလဲ ၊ တော်လှန်ရေးတပ်တွေကဘယ်လိုခုခံနေလဲ ၊စစ်တပ်ရဲ့တန်ပြန်ထိုးစစ်အလုပ်ဖြစ်နိုင်လား စတာတွေကို အခုတစ်ပါတ်မှာပြောပါမယ် ။ ■ကချင်ပြည်နယ် ကချင်ပြည်နယ်အတွင်း နယ်မြေ အများအပြား ဆုံးရှုံးထားတဲ့ အာဏာသိမ်းစစ်တပ်ဟာ လက်လွှတ်ခဲ့ရတဲ့ နယ်မြေတွေ ပြန်ထိန်းချုပ်နိုင်ဖို့စစ်အင်အားအလုံးအရင်းဖြည့်တင်းတာ စစ်ရေးလှုပ်ရှားတာတွေ ဆက်တိုက်လုပ်နေလို့ ကချင်လွတ်လပ်ရေးတပ်မတော်(KIA)ဦးဆောင်တဲ့ ပူးပေါင်းတပ်နဲ့ တိုက်ပွဲတွေဖြစ်တာ ၊စစ်ရေးတင်းမာတာတွေ မြင့်တက်လာနေပါတယ်။ မေလအတွင်း ကချင်ပြည်နယ်ဖားကန့် လုံးခင်းဒေသ၊ ရွှေကူမြို့နယ်၊ မိုးညှင်းမြို့နယ်၊ တနိုင်းမြို့နယ်တွေ နဲ့ ရှမ်းမြောက်မှာKIAထိန်းချုပ်ထားတဲ့မဘိန်းမြို့နယ်တွေမှာတိုက်ပွဲတွေ ဆင်တိုက်ဖြစ်ခဲ့ပါတယ်။ မေလ ၁၂ရက်မှာ မြစ်ကြီးနားကို စစ်ကား အစီး ၁၀၀ ကျော် စစ်အင်အားဖြည့်တင်းလာလို့ ဒေသတွင်း စစ်ရေးတင်းမာနေကြောင်းလည်း KIA သတင်းပြန်ကြားရေးဌာန တာဝန်ခံဗိုလ်မှူးကြီးနော်ဘူကပြောပါတယ်။ ဒီလို အင်အားဖြည့်တင်းမှုဟာ စစ်တပ်က သူတို့ အရေးပေါ် အခြေအနေ စစ်အုပ်ချုပ်ရေးကြေညာထားတဲ့ ဆွမ်ပရာဘွမ်၊ ရွှေကူ၊ အင်ဂျန်းယန်၊၊ ဆော့လော်၊ ချီဖွေစတဲ့ မြို့နယ်တွေကို စစ်ဆင်ရေးလုပ်ဖို့ ဖြစ်နိုင်တယ်လို့လည်းသူကသုံးသပ်ပါတယ်။ စစ်ကောင်စီဟာ ရွှေကူမြို့နယ်မှာ အင်အားထောင်ချီစုဖွဲ့ပြီး တစ်နှစ်ခွဲကျော်ကြာ တိုက်ပွဲဖြစ်နေတဲ့ ဗန်းမော်ကို စစ်ကူအင်အားဖြည့်တင်းဖို့ လမ်းကြောင်းတွေကို ပြန်လည်ထိန်းချုပ်နိုင်ဖို့ ကြိုးပမ်းနေပါတယ်။ဒါကြောင့် ရွှေကူမြို့နယ်အတွင်းမှာ KIAနဲ့ တိုက်ပွဲတွေဖြစ်နေပါတယ်။ရွှေကူ စစ်မျက်နှာမှာ စစ်တပ်ဘက်က တင့်ကားတွေပါ သုံးထိုးစစ်ဆင်လာတာလို့ စစ်ရေးသတင်းရင်းမြစ်က ပြောပါတယ်။ အလားတူ ရှမ်းမြောက်င မဘိမ်းမြို့ကိုလည်း ပြန်လည်ထိန်းချုပ်နိုင်ဖို့ မိုးမိတ်ဘက်မှာ စစ်အင်အားထောင်ချီ စုဖွဲ့ စစ်ပြင်နေလို့ စစ်ရေးတင်းမာနေပါတယ်။ “တိုက်ပွဲကတော့ အကြီးအကျယ်ဖြစ်မှာ။ ရက်ရက်စက်စက်ကို ဖြစ်မှာ။ ရွှေကူကနေ သူတို့ အထက်ကို ဆက်ပြီးမှ တက်လာလို့ရှိရင် တိုက်ပွဲက အကြီးအကျယ်ဖြစ်မှာ” လို့ ကချင်ဒေသ စစ်ရေး သတင်းရင်းမြစ်က ပြောပါတယ်။ ■ချင်းပြည်နယ် အာဏာသိမ်းစစ်တပ်က ချင်းမြောက်ပိုင်း ဖလမ်းမြို့နယ်နဲ့ တီးတိန်မြို့နယ်ကို ပြန်လည်ထိန်းချုပ်နိုင်ဖို့ ၂၀၂၅ အောက်တိုဘာကနေ စစ်အင်အားအလုံးအရင်းနဲ့ ထိုးစစ်ဆင်ခဲ့ရာ ချင်းတော်လှန်ရေး ပူးပေါင်းတပ်တွေနဲ့ ခေါက်လကျော်ကြာ တိုက်ပွဲတွေ ပြင်းထန်ခဲ့ပါတယ်။ ၂၀၂၆ ဧပြီမှာတော့ စစ်တပ်က ချင်းညီနောင်သိမ်းထားတဲ့ ဖလမ်းမြို့ကို ပြန်လည်ရရှိသွားသလို ဒေသတွင်း လမ်းပိုင်းတွေကို ပြန်လည်ထိန်းချုပ်နိုင်ခဲ့ပါတယ်။ ဒါပေမဲ့ချင်းမြောက်ပိုင်းထိုးစစ်အတွင်း ချင်းတော်လှန်ရေးတပ်တွေရဲ့ ခုခံမှုကြောင့် စစ်ကောင်စီဘက်က တပ်ဖွဲ့ဝင် ၃၀၀ကနေ ၅၀၀ အကြား သေဆုံးထိခိုက် အင်အားပြုန်းတီးတာရှိခဲ့တယ်လို့ ချင်းတော်လှန်ရေးတပ်ဖွဲ့တွေကပြောကြားထားပါတယ်။ ဖလမ်းကို ပြန်ရတဲ့ စစ်တပ်ဟာ ဖလမ်း-ဟားခါး လမ်းကြောင်းကို ပြန်ထိန်းချုပ်နိုင်ဖို့ မေလဆန်းကစပြီး ထိုးစစ်ဆင်နေလို့ ချင်းပြည်ကောင်စီ တပ်ဖွဲ့တွေနဲ့ တိုက်ပွဲတွေ ပြင်းထန်ခဲ့သလို တီးတိန်မြို့နယ်ကို ကလေးဘက်ကနေ စစ်အင်အားတွေ ထပ်မံ ဖြည့်တင်းလို့ ချင်းညီနောင် ပူးပေါင်းတပ်နဲ့ မေလ ပထမပတ် အတွင်း ၅ရက်ဆက် တိုက်ပွဲတွေ ဖြစ်ခဲ့ပါတယ်။ တီးတိန်မြို့ကို ချင်းညီနောင်က သိမ်းပိုက်မယ်လို့ အသိပေးထားချိန်မှာ စစ်တပ်က အင်အားတွေ ထပ်ဖြည့်ခဲ့တာဖြစ်ပါတယ်။တဖက်မှာလည်း ချင်းညီနောင် အဖွဲ့ဝင် ချင်းပြည်သူ့အစည်းအရုံး/ချင်းပြည်သူ့တပ်မတော်(CPU/CPA) ထိန်းချုပ်ထားတဲ့ ချင်းတောင်ပိုင်းမြို့နယ်တွေကို လေကြောင်းစစ်ဆင်ရေးတွေ အပြင်းအထန် ပြုလုပ်ခဲ့သလို ချင်းတောင်ပိုင်းနဲ့ ဆက်စပ်နေတဲ့ မကွေးတိုင်း ဆောမြို့နယ်ကို စစ်အင်အားတွေ ဖြည့်တင်းနေလို့ တိုက်ပွဲတွေပိုဖြစ်လာနိုင်တယ်လို့ ချင်းတော်လှန်ရေးတပ်တွေက အသိပေးထားပါတယ်။ စစ်ကောင်စီဟာ မေလ ဒုတိယပတ်မှာ ချင်းတောင်ပိုင်း မင်းတပ်မြို့နယ်ကိုလေးရက်ဆက်ဗုံးကြဲခဲ့ပြီး ဧပြီလ ကုန်ပိုင်းနဲ့ မေလအတွင်း ကန်ပက်လက်မြို့နယ်ကို ဗုံးကြဲခဲ့ပါတယ်။ လေယာဉ်အုပ်တွေနဲ့ အကြိမ်ပေါင်းများစွာ ကြဲတာ၊ အတွဲလိုက်ဗုံးသီးတွေ၊ မီးလောင်ဗုံးတွေ သုံးတာ ရှိခဲ့တယ်လို့ ဒေသခံ သတင်းရင်းမြစ်တွေက အသိပေးထားပါတယ်။ စစ်တပ်ဘက်က စစ်ရေးပြင်ဆင်မှုတွေအရ မကြာခင်တိုက်ပွဲတွေကသတိပေးထားပါတယ်။ဒါကြောင့် ပြည်သူတွေ လူစုလူဝေး ရှောင်ဖို ဗုံးခိုကျင်း ကတုတ်ကျင်းတွေ အဆင်သင့်တူးထားဖို့ လေကြောင်း သတိရှိဖို နားစွန့်ဖို ချင်းပြည်သူ့အစည်းအရုံးနဲ့ ဒေသခံတွေက နှိုးဆော်ထားပါတယ်။ 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 #ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA