TRIKITRAKA TRIKITRON 2003 (1X23) Santurtzi – “SAN PELIPE JAIAK”

Euskal Telebistak 2003. urtean zehar emititutako Trikitraka Trikitron programaren 1. denboraldiko 23. atala da hau, 2003. urteko maiatzaren 5ean Santurtziko Serantes antzokian grabatua. Atal honetan, Maitane eta Pepitto aspertuta azalduko dira, geltokian inoiz ez delako ezer berezirik gertatzen. Pailazoak agertzean, ordea, gaur zer egun den gogoraraziko dute: San Pelipe eguna da, eta horren ondorioz, jaiak ospatuko dituzte geltokian. Tartean, Txiskiñe antzerki taldearen eskutik, Kirika eta Kirikoren abenturak ikusi ahal izango ditugu, baita Elvi sabelhiztuna eta Ritxi untxia ere. Horretaz gain, haurrek Pelipe trenari jaten emateko ikatz-jaurtiketan arituko dira. Hori gutxi balitz, Galaxik euritakoa zertarako balio duen ikasiko du. Azken partean, pailazo bakoitzak ekitaldi desberdin bat proposatuko du. Festetan zer ekitaldi egingo duten erabakitzeko, karaoke lehiaketa bat egingo dute. Gainera, Txirri, Mirri eta Txiribitonek abesti hauek abestuko dituzte: “Erosketing”, “Barre egin”, “Euskal Herriko mendiak” eta “Altza Pelipe!”.