MWANAUME AJERUHIWA VIBAYA MARIKITI KUTOKANA NA TUHUMA ZA WIZI WA NYETI

Mwanamume mmoja amejeruhiwa vibaya katika eneo la Marikiti mjini Mombasa baada ya kushambuliwa na umati wa watu waliomtuhumu kuhusika na madai ya kupotea kwa sehemu za siri za wanaume. Akithibitisha tukio hilo, mkuu wa polisi wa Mvita, Nicholas Chalulot, amesema mwanamume huyo aliokolewa na maafisa wa polisi baada ya umati kuanza kumshambulia kutokana na tuhuma hizo ambazo bado hazijathibitishwa. Kwa mujibu wa polisi, majeruhi amepelekwa hospitalini kwa matibabu huku uchunguzi ukianzishwa ili kubaini chanzo cha madai hayo na mazingira yaliyosababisha wananchi kuchukua hatua hiyo. Chalulot amewataka wakazi wa Mombasa kuepuka kueneza uvumi na kuchukua sheria mikononi, akionya kuwa yeyote atakayepatikana akihusika katika vitendo vya kueneza uvumi na kuhatarisha maisha atachukuliwa hatua kwa mujibu wa sheria.