MWANAFUNZI  CHUO CHA KIISLAM MOROGORO (MUM) AKUTWA AMEFARIKI CHUMBA CHAKE .

Mwanafunzi wa  Chuo Kikuu cha Kiislamu Morogoro (MUM) mwaka wa tatu kozi ya Ualimu wa Sayansi Hussein Rashid Lipilingwe (23) amekutwa amefariki  ndani ya chumba chake alichokuwa akiishi na  mwili wake umegundulika baada ya siku nne ukiwa  umeanza kuharibika.   Majirani wa karibu na sehemu aliyokuwa akiishi marehemu Hussein wamesema walisikia harufu kali isiyo ya kawaida kutoka chumbani kwake ndipo walipopata wasiwasi na kujaribu kumpigia simu  ambayo ilisikika ikiita bila ya  kupokelewa. Kwa mujibu wa Rais wa Serikali ya Wanafunzi wa MUM Hassan Yuda, amesema  marehemu aliwahi kuanguka  chuoni hapo siku ya  tarehe 17 Kutokana na maradhi yaliyokuwa yakimsumbua na tangu hapo hakuwahi kuonekana tena mazingira ya chuoni. Mwenyekiti wa mtaa wa Mbuyuni  Gerrad Mawanja  amesema mara baada ya kupata taarifa hiyo alifika eneo la tukio na kutoa taarifa kwa jeshi la polisi ambapo jitihada za kuvunja mlango zilifanyika na hatimaye mwili wa marehemu ulikutwa ndani ukiwa tayari umeanza kuharibika. Taarifa ya Kamanda wa jeshi la  Mkoa wa Morogoro, SACP Alex Mkama, imesema uchunguzi wa  awali umebaini kuwa  kifo hicho kimetokana na maradhi yaliyokuwa yanamsumbua ambapo mwili wa marehemu unatarajiwa kukabidhiwa kwa ndugu na kusafirishwa kuelekea Mkoani Lindi kwaajili ya maziko. MWISHO.