MBULU WAPOKEA GARI LA ZIMAMOTO

NA Afarah Suleiman Mbulu -Manyara Mkuu wa Wilaya ya Mbulu Michael John Semindu Amepokea gari jipya la kuzima moto ,hatua inayokuja baada ya muda mrefu kuto kuwepo kwa gari la Zimamoto katika wilaya hiyo,hali iliyopelekea wananchi kukosa huduma hiyo muhimu. Akizungumza wakati wa mapokezi hayo, Semindu, amesema gari hilo litakuwa msaada mkubwa katika kukabiliana na majanga ya moto yanapotokea, na hivyo kuongeza usalama wa maisha na mali za wananchi. Aidha, Semindu ameishukuru Serikali ya Awamu ya Sita inayoongozwa na Rais wa Jamhuri ya Muungano wa Tanzania, Mhe. Dkt. Samia Suluhu Hassan, kwa kuendelea kuboresha huduma za kijamii na kusogeza huduma muhimu karibu na wananchi. Kwa upande wake, Mkaguzi Msaidizi wa Zimamoto Wilaya ya Mbulu Zablon Mangare, amesema kuwa ujio wa gari hilo utarahisisha kwa kiasi kikubwa utendaji kazi wa zimamoto wilayani humo. Pia amewahimiza wananchi kutumia huduma za zimamoto kwa usahihi na kutoa taarifa mapema pindi majanga ya moto yanapotokea.