Жас патриоттар салтанатты түрде ант қабылдады

Кербұлақ ауданы аумағындағы Сарыөзек орта мектебінде 5 және 7 - кадет сынып оқушыларын «Жас сарбаз» және «Жас қыран» жасөспірімдер әскери – патриоттық қозғалысы қатарына қабылдауға арналған салтанатты ант қабылдау рәсімі жоғары деңгейде өтті. Салтанатты жиын Қазақстан Республикасының Мемлекеттік Туының ортаға шығарылуымен басталды. Гарнизонның әскери оркестрінің сүйемелдеуімен Қазақстан Республикасының Әнұраны орындалып, шараға қатысушылар ерекше рух пен патриоттық сезімді сезінді. Жиынның ең толқытар сәті – ант қабыладу рәсімі болды. Болашақ Отан қорғаушылары сап түзеп ортаға шығып, «Жас сарбаз» және «Жас қыран» ұйымдарының қатарына қабылдануға арналған салтанатты анттарын берді. Оқушыларға әскери-патриоттық қозғалыстың арнайы төсбелгілері табысталды. Сонымен қатар, мектеп өнерпаздары ән шырқап, би билеп, дефиле көрсетіп, мерекелік кештің сәнін кіргізді. Өз кезегінде жас сарбаздар мектеп қабырғасында үйренген машықтарын паш етті. Олар саптық және патриоттық әндер орындап, көпшілік алдында салтанатты шерумен жүріп өтті.