WIZARA YA ARDHI YAKABIDHI HATI ZA UMILIKI PWANI MCHANGANI KATIKA WIKI YA ARDHI

Wizara ya Ardhi, Maendeleo na Makaazi Zanzibar imekabidhi hati za umiliki wa ardhi kwa wananchi wa Shehia ya Pwani Mchangani, Mkoa wa Kaskazini Unguja, ikiwa ni sehemu ya maadhimisho ya Wiki ya Ardhi yanayoendelea nchini. Akizungumza katika hafla hiyo, Mkuu wa Mkoa wa Kaskazini Unguja, Mhe. Cassian Gallos Nyembo, amesema hatua hiyo itasaidia wananchi kujiepusha na migogoro ya ardhi kwa kuhakikisha wanamiliki ardhi zao kwa mujibu wa sheria na taratibu zilizowekwa. Kwa upande wake, Waziri wa Ardhi, Maendeleo na Makaazi Zanzibar, Mhe. Rahma Kassim Ali, amewataka wananchi kuwa waangalifu wanaponunua ardhi kwa kuhakikisha wanathibitisha uhalali wa umiliki wake ili kuepuka matukio ya utapeli. Amesema migogoro ya ardhi imekuwa ikikwamisha maendeleo ya kiuchumi na kijamii katika baadhi ya maeneo, huku akiwataka wananchi kujiepusha na madalali wasiokuwa waaminifu wanaojihusisha na uuzaji wa ardhi ambazo si mali yao. Aidha, Waziri huyo amesisitiza umuhimu wa kupima ardhi na kupata hati za umiliki ili kulinda haki za wamiliki pamoja na kuzuia migogoro inayoweza kujitokeza baadaye, hususan kwa warithi. Wananchi waliokabidhiwa hati hizo wameishukuru Serikali ya Mapinduzi ya Zanzibar pamoja na Wizara ya Ardhi kwa hatua hiyo, wakieleza kuwa itawawezesha kulinda umiliki wa ardhi zao na kupunguza migogoro inayohusiana na ardhi katika maeneo yao. #Zanzibar #WikiYaArdhi #PwaniMchangani #Ardhi #MaendeleoYaMakaazi #KaskaziniUnguja #HatiZaUmiliki #AsamOnlineTV #TrendingNow