Sampoorna Sri Ramayanam - 2025 | Day 26 | Brahmasri Chaganti Koteswara Rao garu

బ్రహ్మశ్రీ డా. చాగంటి కోటేశ్వరరావు గారిచే "సంపూర్ణ శ్రీ రామాయణ ప్రవచనములు" - 2025 l ఇరవై ఆరవ రోజు (19-02-2025) కిష్కింధకాండ - ఐదవ రోజు ప్రవచనము సుగ్రీవుని యొక్క భౌగాళిక పరిజ్ఞానము అత్యంత అద్భుతమని, స్వామి హనుమ తన బుద్ధి, బలము మరియు వేగము చేత తన ప్రభువు యొక్క పూర్తి నమ్మకమును చూరగొన్న మహాత్ముడని పూజ్య గురుదేవులు "ప్రవచన నిధి" బ్రహ్మశ్రీ డా. చాగంటి కోటేశ్వర రావు గారు ప్రవచించారు. విశాఖపట్నం కొమ్మాదిలోని గాయత్రీ మహిళా ఇంజనీరింగ్ కళాశాలలో జరుగుతున్న సంపూర్ణ శ్రీరామాయణ ప్రవచనములలో భాగముగా కిష్కింధకాండలో వానరులందరూ సీతాన్వేషణ కొరకు బయలుదేరిన ఘట్టమను గూర్చి వారు ప్రవచనము చేశారు. సుగ్రీవుని ఆజ్ఞను అనుసరించి ఎంతో బలము కలిగిన కొన్ని కోట్ల కోతులు, కొండముచ్చులు, భల్లూకములు అన్నీ కిష్కింధకు చేరుకోగా ఆ ప్రాంతము మొత్తము వానరములతో నిండిపోయిందని, అప్పుడు సుగ్రీవుడు సీతాన్వేషణ కొరకు ఎవరెవరు ఏ దిక్కునకు వెళ్లాలో నిర్ణయము చేస్తూ తూర్పుకు వెళ్లే వానరులకు వినతుని నాయకునిగాను, పశ్చిమమునకు వెళ్లే వానరులకు సుషేణుడిని నాయకునిగాను, ఉత్తరమునకు వెళ్లే వానరులకు శతబలుని నాయకునిగాను, దక్షిణమునకు వెళ్లే వానరులకు అంగదుని నాయకునిగాను నియమించాడని శ్రీ గురువుగారు వివరించారు. తనకున్న అద్భుతమైన భౌగాళిక పరిజ్ఞానము చేత సుగ్రీవుడు మేరు పర్వతమునకు ఏయే దిక్కున ఎంత దూరం వెళితే ఏ ఏ పర్వతములు, నదులు, సాగరములు వంటివి వస్తాయో, వాటి సౌందర్యము మరియు అక్కడ పొంచి ఉన్న ప్రమాదముల గూర్చి ఆయా దిక్కు చివరి వరకు తెలియజేసిన వైనాన్ని వారు వివరించి అది విన్న శ్రీరాముడు కూడా సుగ్రీవుని యొక్క పరిజ్ఞానమునకు ఆశ్చర్యపోయాడని తెలియజేశారు. శ్రీరామాయణంలో చెప్పబడిన భౌగాళిక విశేషములు కొన్ని నామాంతరము చెందినప్పటికీ ఇప్పటికీ అట్లాగే ఉండటం శ్రీరామాయణము పరమ సత్యమని తెలియజేయటానికి తార్కాణమని వారు అభివర్ణించారు. అందరు వానరములు సీతాన్వేషణ కొరకు అన్ని దిక్కులకు బయలుదేరినప్పుడు, సుగ్రీవుడు స్వామి హనుమను మాత్రం వెనుకకు పిలిచి గొప్ప బుద్ధి, బలము మరియు వేగము కలిగిన హనుమ మాత్రమే ఈ రామ కార్యమును సాధించి తన పరువును నిలబెట్టాలని హనుమకు చెప్పగా శ్రీరాముడు కూడా హనుమ పట్ల తన ప్రభువైన సుగ్రీవునకు గల నమ్మకమునకు సంతోషించి, హనుమ యొక్క గొప్పతనమును తెలుసుకున్నారని శ్రీ గురువుగారు వివరించారు. అప్పుడు శ్రీరాముడు హనుమకు సీతమ్మ కనిపించినప్పుడు అభిజ్ఞానముగా చూపించమని తన అంగుళీయకమును ఇచ్చిన సంఘటన గూర్చి వారు వివరించారు. అన్ని దిక్కులకు వానరులందరూ అత్యంత ఉత్సాహముతో సీతాన్వేషణ కొరకు బయలుదేరిన ఘట్టము వరకు శ్రీ రామాయణ ప్రవచనము సాగినది. #SriChagantiVaani #SriChagantiPravachanamulu #ChagantiKoteswaraRaoGaru #Ramayanam #sampoornaramayanam #SampoornaRamayanam #ChagantiRamayanam #ChagantiLatestPravachanamulu #Ramayanam2025 #sriguruvanichaganti #ChagantiKoteswaraRaoGaru #ChagantiPravachanam #GuruvaniChagantiKoteswaraRaoGaru #sreeguruvani #sriguruvaani #sriguruvani #chagantikoteswararaogaru #chaganti #chagantiramayanam #vizag #visakhapatnam #2025