Sampoorna Sri Ramayanam - 2025 | Day 27 | Brahmasri Chaganti Koteswara Rao garu

బ్రహ్మశ్రీ డా. చాగంటి కోటేశ్వరరావు గారిచే "సంపూర్ణ శ్రీ రామాయణ ప్రవచనములు" - 2025 l ఇరవై ఏడవ రోజు (20-02-2025) కిష్కింధకాండ - ఆరవ రోజు ప్రవచనము రామకార్యములో సహాయము చేసిన కారణము చేత సంపాతికి కాలిపోయిన రెక్కలు తిరిగి వచ్చాయని, రామ కథను చెప్పుకున్నంత మాత్రం చేత మరణిద్దామనుకున్న వానరులందరూ జీవించి అభ్యున్నతిని పొందారని, రామ కథ, రామకార్యము, రామ నామము అంత గొప్పవని పూజ్య గురుదేవులు "వ్యాఖ్యాన వాచస్పతి" బ్రహ్మశ్రీ డా. చాగంటి కోటేశ్వర రావు గారు ప్రవచించారు. విశాఖపట్నంలో జరుగుతున్న సంపూర్ణ శ్రీరామాయణ ప్రవచనములలో భాగముగా కిష్కింధకాండలో దక్షిణ దిక్కుకు వెళ్లిన వానరులు జరిపిన సీతాన్వేషణ విశేషములను వారు వివరించారు. దక్షిణ దిక్కుకు వెళ్లిన వానరులు దారిలోని పర్వతములు, గుహలు, అరణ్యములు అన్నీ వెతుకుతూ వెళ్ళగా వారికి దారిలో తన పుత్రుడు మరణించటం వలన ఆగ్రహించిన కండు మహర్షి చేత శపింపబడిన ఒక ప్రాంతం కనిపించిందని, అక్కడ చెట్లు గాని ఆహారము కానీ నీరు కానీ లేక పశుపక్షాదులకు కూడా ఆవాస యోగ్యము కాని అతి భయంకరమైన ప్రదేశము అని, అది దాటిన తర్వాత అంగదుడు ఒక రాక్షసుడిని చూసి, రావణాసురుడే అనుకుని అతడిని మర్దించి సంహరించాడని శ్రీ గురువుగారు వివరించారు. ఇంకొంచెం ముందుకు వెళ్లిన వానరులకు ఒక పెద్ద గుహ నుండి జల పక్షులు బయటికి రావడం కనిపించగా వారందరూ అందులోకి ప్రవేశించారని, అందులో అనేక రకమైన ఆహార పదార్ధములు, భవనములు కనిపించి వారు ఆశ్చర్యపోయారని, అక్కడ ఒక యోగిని కనిపించి, వారికి ఆ స్వయంప్రభ బిలము యొక్క విశేషములు చెప్పిందని వారు తెలియజేసారు. రాక్షస శిల్పి అయిన మయుడు బ్రహ్మగారి వరము చేత, శుక్రాచార్యుల వారి నుండి పొందిన ఐశ్వర్యము చేత ఇంత గొప్ప భవనములను ఇక్కడ నిర్మించి ఆ తదుపరి హేమ యందు అనురక్తుడు అయ్యిన కారణము చేత దేవేంద్రడు తన వజ్రాయుధముతో అతనిని సంహరించాడని, ఆ తరువాత బ్రహ్మగారు ఈ ఐశ్వర్యమంతా హేమకు ఇచ్చివేయగా ఆ హేమ వీటిని కాపాడమని యోగినిని ఇక్కడ ఉంచిందని, ఆవిడ ఆ స్వయంప్రభ బిలము యొక్క విశేషములను వానరులకు చెప్పిన వైనమును వారు వివరించారు. ఆ బిలము నుండి బయటకు వెళ్ళుట అసాధ్యమైనప్పటికీ వానరులందరూ నిస్వార్ధముగా రామకార్యము కొరకు చేస్తున్న ప్రయత్నమునకు యోగిని వారిని అనుగ్రహించి, అక్కడ ఉన్న ఆహారమును తినమని, తదుపిరి వారిని బిలము దాటించి సముద్రపు ఒడ్డుకు చేర్చిందని వారు తెలియజేశారు. సుగ్రీవుడు తమకిచ్చిన గడువు అంతా ఆ బిలములోనే తీరిపోగా ఎంతో బాధపడిన అంగదుడు సుగ్రీవుని నిందించి, తాను ఇక వెనక్కి వెళ్ళనని ఇక్కడే మరణిస్తానని చెప్పగా హనుమ అతడిని వారించటము, ఆయన జరగవలసిన కార్యమును గూర్చి ఆలోచించమని చెప్పినప్పటికీ అంగదుడు, ఇతర వానరులు నిరాశ చెంది ప్రాయోపవేశం చేయుటకు సిద్ధపడి, ఇందుకు కారణమైన రామ కథ చెప్పుకుంటూ జటాయువు యొక్క వృత్తాంతమును గుర్తు చేసుకోగా, జటాయువు పేరు విన్న అతడి అన్న అయిన సంపాతి వారి వద్దకు వచ్చిన సంఘటనను గూర్చి శ్రీ గురువుగారు వివరించారు. తన తమ్ముని మరణ వార్త విన్న సంపాతి జటాయువుకు ఉదక క్రియలు చెయ్యగా జాంబంతుడు వారి వృత్తాంతము గూర్చి అడిగాడని, అప్పుడు సంపాతి మాట్లాడుతూ అత్యంత బలవంతులైన సంపాతి, జటాయువు ఆకాశమార్గంలో ప్రయాణము చేస్తూ సూర్యుని వద్దకు వెళుతుండగా తన తమ్ముని రెక్కలు కాలిపోకుండా సంపాతి జటాయువును కాపాడుకొనుట, అందుచేత అతడి రెక్కలు కాలిపోయి అతడు కిందకు వింధ్య పర్వతము పై పడిపోగా, అటు వచ్చిన నిశాకర మహర్షి అతడు రామకార్యములో సహాయము చేసినప్పుడు అతనికి తిరిగి రెక్కలు వస్తాయని చెప్పుట గూర్చి వాహనలకు వివరించాడని వారు తెలియజేసారు. రావణాసురుడు సీతమ్మను అపహరిస్తుండగా తన కుమారుడైన సుపాశ్వుడు చూచి తనకు చెప్పాడని, తనకు రెక్కలు, బలము లేక సీతమ్మను తాను కాపాడలేకపోయానని, వినతా సంతానమైన తమకు గొప్ప దృష్టి ఉందని, అందుచేత తాను ఇక్కడ కూర్చునే నూరు యోజనముల ఆవల రావణాసురుని లంకా నగరములో ఉన్న సీతమ్మను చూడగలుగుతున్నానని, వానరులు ఉత్సాహమును పొంది, సముద్రమును దాటి, సీతమ్మను చూచి, ఆ వార్త శ్రీరామునకు తెలియజేసి, రావణ సంహారము చేయించవలసినదని సంపాతి చెప్పగా వెంటనే అతడికి కాలిపోయిన రెక్కలు తిరిగి వచ్చాయని, రామకార్యములో మాటసాయం చేయటముచేతనే సంపాతికి శుభము కలిగిందని, అది రామకార్యాము యొక్క శక్తియని శ్రీ గురువుగారు అభివర్ణించారు. #SriChagantiVaani #SriChagantiPravachanamulu #ChagantiKoteswaraRaoGaru #Ramayanam #sampoornaramayanam #SampoornaRamayanam #ChagantiRamayanam #ChagantiLatestPravachanamulu #Ramayanam2025 #sriguruvanichaganti #ChagantiKoteswaraRaoGaru #ChagantiPravachanam #GuruvaniChagantiKoteswaraRaoGaru #sreeguruvani #sriguruvaani #sriguruvani #chagantikoteswararaogaru #chaganti #chagantiramayanam #vizag #visakhapatnam #2025