Tv Klan - SPAK zbardh 2 atentate me pagesë në Fier

Dëshmia e të penduarit të drejtësisë Henrik Hoxhaj, krahut të djathtë të vrasësit me pagesë Nuredin Dumani ka hedhur ditë edhe mbi ngjarje të tjera të pazbardhura ndër vite. Të tilla janë 2 atentatet ndaj Aredin Beharit në Fier, i cili ishte në konflikt të vazhdueshëm me Albert Pashajn. SPAK thotë se ky i fundit vendosi të paguajë Henrik Hoxhajn dhe Skerdi Tasen për ta eliminuar Beharin. Hoxhaj dhe Tase e bënë tentativën e parë në këtë lokal në 5 Nëntor 2017. Sipas SPAK ishte Skerdi Tase që hapi zjarr ndaj lokalit ku ndodhej Behari, por ai e ka pikasur dhe është shtrirë menjëherë në tokë duke u shpëtuar plumbave. Në atë kohë Albert Pashaj është shpallur në kërkim policor, por në mungesë të provave çështja ndaj tij është mbyllur. Megjithatë ai nuk është tërhequr nga synimi për të eliminuar Aredin Beharin. Për këtë ka paguar 80 mijë euro sërish Henrik Hoxhajn dhe Skerdi Tasen të cilët siguruan armën e krimit dhe një makinë. Këtë herë roli i ekzekutorit iu caktua Henrik Hoxhajt meqë herën e parë Skerdi Tase dështoi. Mbrëmjen e 3 prillit 2019 ata e pritën shënjestrën pranë një biznesi dhe Henrik Hoxhaj hapi zjarr me një automatik kallashnikov, por Behari mundi sërish të shpëtojë pasi Hoxhajt iu bllokua arma. Pas krimit ata dogjën makinën në dalje të qytetit për të humbur gjurmët. Skerdi Tase ra në pranga pas atentatit të dështuar ndaj administratorit të një shkolle private në Tiranë në janar 2022 ndërsa Hoxhaj u arrestua së bashku me Dumanin në mars të atij viti. Tashmë në pranga është vënë edhe Albert Pashaj që akuzohet për vrasje të mbetur në tentativë. Tv Klan SUBSCRIBE to “RTV KLAN” on YouTube for more videos! Email: [email protected] Për më shumë informacione vizitoni faqen tonë web https://tvklan.al/ Videot e fundit nga Tv Klan i gjeni në faqen https://tvklan.al/video/ Follow Tvklan on Facebook:   / tvklan   Follow Tvklan on Instagram:   / rtvklan   Programet e Tv Klan mund t’i ndiqni edhe në faqen https://tvklan.al/programe/