||SIVASAHASRANAMASTHOTHRAM|| ॐ ശിവസഹസ്രനാമസ്തോത്രം ॐ

പതിനെട്ടിലധികം ശിവസഹസ്രനാമസ്തോത്രങ്ങൾ ഉള്ളതിൽ ഏറ്റവും പ്രസിദ്ധമായത് മഹാഭാരതത്തിലെ അനുശാസന പർവ്വത്തിലെ പതിനേഴാം അധ്യായത്തിലെ ശിവസഹസ്രനാമസ്തോത്രമാണ്. മഹാഭാരത യുദ്ധശേഷം ശ്രീകൃഷ്ണ ഭഗവാന്റെ നിർദ്ദേശപ്രകാരം പഞ്ചപാണ്ഡവർ ശരശയ്യയിൽ കിടക്കുന്ന ഭീഷ്മപിതാമഹന്റെ അനുഗ്രഹം വാങ്ങാൻ എത്തുകയും അദ്ദേഹം യുധിഷ്ഠിരന് രാജധർമ്മവും മോക്ഷപ്രാപ്തിക്കായി വിഷ്ണു സഹസ്രനാമ സ്തോത്രവും ഉപദേശിച്ചുകൊടുക്കുകയും ചെയ്തു. മഹാദേവന്റെ തിരുനാമങ്ങൾ കൂടി ഉപദേശിച്ചു തരാൻ യുധീഷ്ഠിരൻ ആവശ്യപ്പെട്ടപ്പോൾ അതിനു പ്രാപ്തൻ ശ്രീകൃഷ്ണ ഭഗവാനാണെന്ന് പിതാമഹൻ പറഞ്ഞു, അങ്ങനെ ഉപമന്യു മഹർഷി തനിക്ക് ഉപദേശിച്ച ശിവസഹസ്രനാമ സ്തോത്രം ഭഗവാൻ ശ്രീകൃഷ്ണൻ യുധിഷ്ഠിരനു ഉപദേശിച്ചുകൊടുത്തു.