અમેરિકામાં 15 વર્ષ વિતાવ્યા બાદ આખરે હાર માનવી પડી

અમેરિકામાં 15 વર્ષ લાંબી કરિયર દરમિયાન સારી સેલેરી અને સારી જોબની સાથે-સાથે બીજી તમામ સવલતો મળી હોય તો સ્વાભાવિક છે કે અમેરિકામાં રહેતો કોઈપણ ઈન્ડિયન હોમ કન્ટ્રીમાં પાછા આવવાનો વિચાર સુદ્ધા ના કરે. જોકે, હવે અમેરિકા એટલું ઝડપથી બદલાઈ રહ્યું છે કે જે લોકો આખી જિંદગી અમેરિકામાં વિતાવવાની ગણતરી માંડીને બેઠા હતા તેમને હવે કમને ઈન્ડિયા પાછા આવવું પડી રહ્યું છે. ખાસ તો જે લોકો H-1B પર અમેરિકામાં વર્ષોથી રહે છે તેમની હાલત એટલી બધી ખરાબ થઈ ગઈ છે કે જાણે યુએસમાં તેમના માટે કોઈ જગ્યા જ નથી રહી. આવા જ એક કેસમાં અમેરિકામાં 15 વર્ષ સુધી કામ કર્યા બાદ આખરે જોબ છૂટી જતાં એક ઈન્ડિયન હવે હથિયાર હેઠાં મૂકી ઈન્ડિયા પાછો આવી રહ્યો છે. તેણે શેર કરેલો અનુભવ એ વાતની વધુ એક સાબિતી આપી રહ્યો છે કે કેમ હવે લાખો ટેલેન્ટેડ ઈન્ડિયન્સ માટે અમેરિકન ડ્રીમ સમાપ્ત થઈ ચૂક્યું છે?