KILA MGENI ATAMBULIKE RASMI KWA SHEHA HUSIKA - RC MOH'D

Mkuu wa Mkoa wa Mjini Magharibi, Mhe. Moh'd Ali Abdalla, amekutana na Masheha wa Mkoa huo pamoja na maafisa kutoka Jeshi la Uhamiaji katika Skuli ya Tumekuja kwa lengo la kuimarisha ushirikiano katika usimamizi wa wahamiaji na wageni wanaoingia katika maeneo mbalimbali ya Zanzibar. Akizungumza katika mkutano huo, Mhe. Moh'd Ali Abdalla amesema Jeshi la Uhamiaji lina jukumu muhimu la kushirikiana na Masheha katika kutambua wageni kutoka ndani na nje ya nchi, huku akieleza kuwa utoaji wa nakala maalum za utambuzi utasaidia Masheha kufuatilia wageni wanaohamia katika shehia zao na kudhibiti wimbi la wahamiaji haramu. Kwa upande wake, Mrakibu Mwandamizi wa Uhamiaji na Mkuu wa Kitengo cha Uraia, Afisi Kuu Zanzibar, Ndg. Chumu Kombo Amour, amewasilisha mada kuhusu uhamiaji wa ndani na nje ya nchi pamoja na namna ya kutambua uraia wa watu wanaoishi nchini. Amesema miongoni mwa changamoto zinazoikabili Idara ya Uhamiaji ni uwepo wa watu wasiokuwa na nyaraka sahihi za utambulisho pamoja na matumizi ya nyaraka za kughushi kwa lengo la kupata uraia kinyume na sheria. Nao Masheha walioshiriki mkutano huo wamesema wanaendelea kuchukua jitihada za kutambua wageni wanaoingia katika shehia zao, huku wakiomba kuimarishwa kwa ushirikiano kati yao na maafisa wa Uhamiaji pamoja na kupatiwa nyenzo zitakazowasaidia kufuatilia taarifa za wageni kwa ufanisi zaidi. Aidha, wananchi wamehimizwa kutoa taarifa kwa mamlaka husika wanapobaini uwepo wa watu wasiowafahamu katika maeneo yao ili kusaidia kudumisha usalama na utulivu wa jamii. #Zanzibar #Uhamiaji #Masheha #Usalama #MjiniMagharibi #AsamOnlineTV #Habari #Tanzania