BENK YA DUNIA

Rais wa Zanzibar na Mwenyekiti wa Baraza la Mapinduzi, Mhe. Dkt. Hussein Ali Mwinyi, ameishukuru Benki ya Dunia kwa misaada ya maendeleo inayoendelea kuipatia Zanzibar, inayochangia ukuaji wa uchumi na ustawi wa jamii. Rais Dkt. Mwinyi ameyasema hayo leo, 18 Mei 2026, alipokutana na Mwakilishi Mkaazi wa Benki hiyo nchini Tanzania, Bw. Nathan Belete, aliyefika Ikulu kuaga baada ya kumaliza muda wake wa kazi nchini pamoja na kumtambulisha Mkurugenzi Mpya anayechukua nafasi yake, Bw. Firas Raad. Ameeleza kuwa Zanzibar imepata mafanikio makubwa kutokana na misaada na ushirikiano wa muda mrefu na Benki ya Dunia katika nyanja mbalimbali za kiuchumi na maendeleo, na kumhakikishia mwakilishi huyo kuwa Zanzibar itaendelea kuimarisha uhusiano wake na Benki hiyo. Rais Dkt. Mwinyi amesema misaada ya Benki ya Dunia imeleta tija na mageuzi makubwa katika sekta ya elimu, afya na miundombinu nchini kwa kuimarisha rasilimali watu pamoja na kuzijengea uwezo wa kiutendaji taasisi mbalimbali. Akizungumzia sekta ya afya, amesema misaada hiyo imeiwezesha Zanzibar kuwa na mfumo madhubuti wa afya pamoja na kuwajengea uwezo watendaji wa sekta hiyo, kuimarisha upatikanaji wa vifaa tiba, na kuiomba Benki ya Dunia kuendelea kuweka mkazo zaidi katika kuongeza misaada ili kuwa na uwezo wa kudhibiti na kukabiliana na magonjwa mbalimbali. Akielezea Mradi wa Kuimarisha Miundombinu ya Barabara Mijini (BIG Z), amesema ameridhishwa na maendeleo ya mradi huo aliouelezea kuwa na umuhimu mkubwa kwa Zanzibar, na kuishauri Benki ya Dunia kuendelea kuuunga mkono ili kuleta mafanikio zaidi hatua kwa hatua. Aidha, ameishauri Benki hiyo kuendelea kuunga mkono juhudi za Serikali ya Mapinduzi ya Zanzibar katika kukabiliana na tatizo la uhaba wa umeme na kuhakikisha upatikanaji wa nishati ya uhakika. Dkt. Mwinyi amesema wakati umefika kwa Benki ya Dunia kuwa na afisi Zanzibar, kama ilivyofanyika kwa mashirika mengine ikiwemo Shirika la Afya Ulimwenguni (WHO) na Shirika la Kuhudumia Watoto la Umoja wa Mataifa (UNICEF), ambayo yote yana afisi zao Zanzibar. Rais Dkt. Mwinyi amemtakia heri Bw. Nathan Belete katika utekelezaji wa majukumu yake mapya. Naye Bw. Nathan Belete ameihakikishia Zanzibar ushirikiano zaidi katika utekelezaji wa miradi na mipango mbalimbali ya Benki ya Dunia, huku akisifu hatua kubwa za maendeleo katika sekta mbalimbali pamoja na usimamizi mzuri wa miradi inayofadhiliwa na Benki ya Dunia.